Border News Agency
ဖိလစ်ပိုင်၊ မေ ၇။
အာဆီယံခေါင်းဆောင်တွေအနေနဲ့ အာဏာသိမ်းစစ်တပ်အပေါ်ထားတဲ့ မူဝါဒဟောင်းတွေကိုစွန့်လွှတ်ပြီး သမ္မတဦးဝင်းမြင့်ကိုသာ နိုင်ငံတော်သမ္မတအဖြစ် ဆက်လက်အသိအမှတ်ပြုဖို့ အာဆီယံနိုင်ငံခြားရေးဝန်ကြီးဟောင်းတွေနဲ့ ကုလသမဂ္ဂကိုယ်စားလှယ်ဟောင်းတွေက မေလ ၆ ရက်၊ မနေ့ကတောင်းဆိုလိုက်ပါတယ်။
ဖိလစ်ပိုင်မှာကျင်းပနေတဲ့ ၄၈ ကြိမ်မြောက် အာဆီယံထိပ်သီးအစည်းအဝေးနဲ့တိုက်ဆိုင်ပြီး မြန်မာနိုင်ငံဆိုင်ရာအထူးအကြံပေးကောင်စီ (SAC-M) ကနေ အခုလိုထုတ်ပြန်တောင်းဆိုလိုက်တာပါ။
အာဏာသိမ်းစစ်တပ်ဟာ အာဆီယံရဲ့သည်းခံမှုကိုအခွင့်ကောင်းယူပြီး ပြည်သူတွေအပေါ် အကြမ်းဖက်မှုတွေ ပိုလုပ်လာတယ်လို့လည်း ထောက်ပြထားပါတယ်။
ထိုင်းနဲ့မလေးရှား နိုင်ငံခြားရေးဝန်ကြီးဟောင်းတွေအပါအဝင် နိုင်ငံတကာကျွမ်းကျင်သူတွေက ကျားဟာသူ့အစင်းကြောင်းကို ဘယ်တော့မှပြောင်းမှာမဟုတ်ဘူးဆိုတဲ့ စကားရပ်နဲ့စစ်အုပ်စုရဲ့ သဘာဝကို ဝေဖန်ထားပါတယ်။
ဒေါ်အောင်ဆန်းစုကြည်ကို နေအိမ်အကျယ်ချုပ်ပြောင်းတာနဲ့ ရွေးကောက်ပွဲကိစ္စတွေဟာ နိုင်ငံတကာအသိအမှတ်ပြုမှုရအောင် လုပ်ပြတဲ့ဟန်ပြတွေသာဖြစ်တယ်လို့ ဆိုပါတယ်။
SAC-M ရဲ့ အချက်အလက်တွေအရ ၂၀၂၆ ခုနှစ် မတ်လဟာ အာဏာသိမ်းပြီးနောက်ပိုင်း ပြည်သူအသေအပျောက် အများဆုံးလဖြစ်ခဲ့ပြီး လူပေါင်း ၅၀၀ ကျော်သေဆုံးခဲ့ရပါတယ်။
အာဏာသိမ်းစစ်တပ်ဟာ အာဆီယံရဲ့ ဘုံသဘောတူညီချက်တွေကို အကြိမ်ကြိမ်ချိုးဖောက်နေတာကြောင့် အာဆီယံဘက်က လက်တွေ့ကျကျတုံ့ပြန်ဖို့ အချိန်တန်ပြီလို့ဆိုပါတယ်။
ဒါကြောင့် အာဆီယံအနေနဲ့ စစ်တပ်အရာရှိမှန်သမျှကို အစည်းအဝေးတက်ခွင့်မပေးဘဲ နိုင်ငံရေးအရအဆက်အသွယ်ဖြတ်ဖို့၊သမ္မတဦးဝင်းမြင့်ကိုသာ တရားဝင်အစိုးရအဖြစ်အသိအမှတ်ပြုဖို့နဲ့ နယ်စပ်ကနေတဆင့် လူသားချင်းစာနာမှုအကူအညီတွေအရောက်ပို့နိုင်အောင် ဖိအားပေးဖို့တိုက်တွန်းထားပါတယ်။
