Border News Agency
တနင်္သာရီ၊ မေ ၇။
တနင်္သာရီမြို့နယ်အခြေစိုက် အာဏာသိမ်းစစ်တပ်ရဲ့ ခမရ ၅၆၁ တပ်ရင်းက တပ်သား ၂ ဦးဟာ မေလ ၆ ရက်နေ့မှာ လက်နက်ခဲယမ်းတွေနဲ့အတူ KNU တပ်မဟာ ၄ ဆီအလင်းဝင်လာတယ်လို့ ကရင်အမျိုးသားအစည်းအရုံးမှ ထုတ်ပြန်ပါတယ်။
အဲဒီတပ်သား ၂ ဦးဟာ MA-1 သေနတ် ၁ လက်၊ MA-11 သေနတ် ၁ လက်၊ ကျည်ဆန် ၂၄၄ တောင့်နဲ့ ကျည်ဘောက် ၇ ခုကို ယူလာပြီး KNLA တပ်ရင်း ၁၁ နဲ့ မဟာမိတ် ပူးပေါင်းတပ်ဖွဲ့တွေဆီမှာ အလင်းဝင်ခဲ့တာဖြစ်ပါတယ်။
ပြီးခဲ့တဲ့ ဧပြီလနောက်ဆုံးပတ်အတွင်းမှာတင် အာဏာသိမ်းစစ်တပ်ကိုစွန့်ခွာပြီး ပြည်သူ့ရင်ခွင် ခိုလှုံလာတဲ့စစ်သား ၁၁ ဦးအထိရှိခဲ့တယ်လို့ ပြည်သူ့ပန်းတိုင်အဖွဲ့ကလည်း သတင်းထုတ်ထားပါတယ်။
စစ်တပ်ထဲမှာ ရောက်နေတဲ့စစ်မှုထမ်းဥပဒေနဲ့ စုဆောင်းခံထားရတဲ့ တပ်သားသစ်တွေအနေနဲ့လည်း နီးစပ်ရာ တော်လှန်ရေးအဖွဲ့တွေဆီ အမြန်ဆုံးခိုလှုံကြဖို့ KNU ဘက်က တိုက်တွန်းနှိုးဆော်ထားပါတယ်။
အဲဒီအလင်းဝင်လာတဲ့ တပ်သားတွေကို KNU က ကောင်းကောင်းမွန်မွန်စောင့်ရှောက်ထားပြီး လိုအပ်တာတွေ ကူညီပေးနေတယ်လို့လည်းဆိုပါတယ်။
