​Border News Agency
အီရန်၊ မေ ၇။

​အီရန်နဲ့ငြိမ်းချမ်းရေးဆွေးနွေးမှုတွေဟာ အခြေအနေကောင်းနေပြီး စစ်ပွဲဟာလည်း အမြန်ဆုံးပြီးဆုံးသွားလိမ့်မယ်လို့ အမေရိကန်သမ္မတ ထရမ့်က မေလ ၆ ရက်၊ မနေ့က ပြောကြားလိုက်ပါတယ်။

ဒါပေမယ့် အီရန်ဘက်ကတော့ အမေရိကန်ရဲ့ ကမ်းလှမ်းချက်တွေကို စိစစ်နေတုန်းပဲလို့ ဆိုပါတယ်။

​သတင်းတွေအရ နှစ်ဖက်စလုံးဟာ အချက် ၁၄ ချက်ပါတဲ့ နားလည်မှုစာချွန်လွှာ (MoU) လက်မှတ်ထိုးဖို့ နီးစပ်နေတယ်လို့ သိရပါတယ်။

အဲဒီစာချုပ်မှာ အီရန်က နျူကလီးယားလက်နက်မထုတ်ဖို့နဲ့ ယူရေနီယံသန့်စင်မှုကို ၁၂ နှစ်ကြာရပ်ဆိုင်းထားဖို့ပါဝင်သလို အမေရိကန်ဘက်ကလည်း ပိတ်ဆို့မှုတွေဖယ်ရှားပေးပြီး အေးခဲထားတဲ့အီရန်ပိုင်ငွေတွေကို ပြန်ပေးဖို့ ရှိနေပါတယ်။

​ဒါပေမယ့် အီရန်အစိုးရ ပြောရေးဆိုခွင့်ရှိသူကတော့ အမေရိကန်ရဲ့ စာသားတွေကို သေချာစစ်ဆေးနေဆဲဖြစ်ပြီး ပါကစ္စတန်ကြားခံအဖွဲ့ဆီကို အကြောင်းပြန်ချက်မပေးရသေးဘူးလို့ ဆိုပါတယ်။

အီရန်လွှတ်တော်ဘက်ကလည်း အမေရိကန်ရဲ့ကမ်းလှမ်းချက်ဟာ လက်တွေ့ထက်သူတို့ဖြစ်ချင်တာတွေကိုပဲ ရေးထားတာလို့ ဝေဖန်နေပါတယ်။

​သမ္မတထရမ့်ကတော့ လာမယ့်အပတ်တရုတ်ခရီးစဉ်မတိုင်ခင် သဘောတူညီချက်ရဖို့မျှော်လင့်နေပြီး တကယ်လို့ ဆွေးနွေးပွဲတွေပျက်ပြားသွားရင်တော့ အီရန်ကိုအပြင်းအထန်ပြန်ပြီးဗုံးကြဲမယ်လို့လည်း ခြိမ်းခြောက်ထားပါတယ်။

တဖက်မှာလည်း အစ္စရေးဝန်ကြီးချုပ်နေတန်ယာဟုက အီရန်မှာရှိတဲ့သန့်စင်ပြီး ယူရေနီယံအားလုံးကို ဖယ်ရှားပစ်ရမယ်လို့ ထရမ့်နဲ့ညှိနှိုင်းနေပါတယ်။

​ပင်လယ်ပြင်အခြေအနေမှာတော့ အမေရိကန်ရဲ့ပိတ်ဆို့မှုဟာ အသက်ဝင်နေဆဲဖြစ်ပြီး မနေ့ကပဲအမေရိကန်ရဲ့ သတိပေးချက်ကိုမလိုက်နာတဲ့ အီရန်ရေနံတင်သင်္ဘောတစီးကို အမေရိကန်ရေတပ်က ပစ်ခတ်တားဆီးခဲ့ပါတယ်။

အီရန်ဘက်ကလည်း ဟော်မုဇ်ရေလက်ကြားကိုဖြတ်သန်းရင် အီရန်ငွေကြေးနဲ့ အခကြေးငွေပေးရမယ်ဆိုတဲ့ စည်းကမ်းအသစ်တွေကို ထုတ်ပြန်ထားပါတယ်။