Border News Agency
နေပြည်တော်၊ မေ ၁၀။
မြန်မာ့သတင်းမီဒီယာတွေမှာ အမျိုးသမီးတွေကို သတင်းရင်းမြစ်အဖြစ် အသုံးပြုမှုဟာ ၂၀၂၅ ခုနှစ်မှာ ၂၉ ရာခိုင်နှုန်းအထိ သိသိသာသာ မြင့်တက်လာတယ်လို့ မြန်မာအမျိုးသမီးသတင်းသမားများအဖွဲ့ (MWJS) ရဲ့ အစီရင်ခံစာမှာ ဖော်ပြထားပါတယ်။
ဒါဟာ ၂၀၁၇ ခုနှစ်က ၁၇ ရာခိုင်နှုန်းနဲ့ ၂၀၂၀ ပြည့်နှစ်က ၁၈ ရာခိုင်နှုန်းသာ ရှိခဲ့တာနဲ့ နှိုင်းယှဉ်ရင် အားတက်စရာ အခြေအနေတခု ဖြစ်တယ်လို့ဆိုပါတယ်။
မီဒီယာအမျိုးအစားအလိုက် ကြည့်မယ်ဆိုရင် ရုပ်မြင်သံကြားမှာ အမျိုးသမီးပါဝင်မှု ၄၄ ရာခိုင်နှုန်းနဲ့ အမြင့်ဆုံးဖြစ်နေပြီး အွန်လိုင်းမီဒီယာမှာတော့ ၂၀ ရာခိုင်နှုန်း ရှိနေပါတယ်။
ဒါပေမယ့် ပုံနှိပ်မီဒီယာတွေမှာတော့ အမျိုးသမီးတွေကို သတင်းရင်းမြစ်အဖြစ် အသုံးပြုမှု မရှိသလောက် နည်းပါးနေသေးတာကို တွေ့ရှိရတယ်လို့ဆိုပါတယ်။
အမျိုးသမီးတွေကို သတင်းထဲမှာ ဖော်ပြတဲ့အခါ ဦးဆောင်မှုကဏ္ဍထက် မိခင်၊အိမ်ထောင်ရှင်မနဲ့ ဈေးဝယ်သူစတဲ့ ရိုးရာပုံစံအတိုင်း ဖော်ပြမှု များနေဆဲဖြစ်သလို ပြည်တွင်းစစ်ကြောင့် ထိခိုက်ခံစားရတဲ့ စစ်ပွဲရဲ့ သားကောင်တွေအဖြစ် ဖော်ပြတာက ၄၀ ရာခိုင်နှုန်းအထိ ရှိနေပါတယ်။
MWJS အနေနဲ့ လက်ရှိဦးဆောင်နေတဲ့ အမျိုးသမီးတွေရဲ့ အသံကို ဒီထက်ပိုပြီး ဖော်ပြပေးဖို့ တိုက်တွန်းထားပါတယ်။
အမျိုးသမီးတွေရဲ့ အခန်းကဏ္ဍ မြင့်တက်လာပေမယ့် မြန်မာ့စာနယ်ဇင်းလွတ်လပ်ခွင့်ကတော့ အဆိုးရွားဆုံး အခြေအနေမှာ ရှိနေပါတယ်။
နယ်စည်းမခြားသတင်းထောက်များအဖွဲ့ (RSF) ရဲ့ ထုတ်ပြန်ချက်အရ မြန်မာနိုင်ငံဟာ ကမ္ဘာ့စာနယ်ဇင်းလွတ်လပ်ခွင့် အဆင့် ၁၆၆ မှာ ရှိနေပြီး အလွန်ဆိုးဝါးတဲ့ အနီရောင်အဆင့် မှာ ဆက်ရှိနေတာပါ။
လွတ်လပ်သော မြန်မာသတင်းမီဒီယာကောင်စီ (IPCM) ရဲ့ အချက်အလက်တွေအရ ၂၀၂၁ ခုနှစ်ကနေ အခု ၂၀၂၅ ခုနှစ် မေလအထိ မတရားဖမ်းဆီးခံရတဲ့ သတင်းသမား ၂၀၀ ကျော်ရှိခဲ့ပါတယ်။
အဲဒီထဲက သတင်းသမား ၁၉ ဦးဟာ အကျဉ်းထောင်တွေထဲမှာ ဆက်လက်ထိန်းသိမ်းခံထားရဆဲဖြစ်ပြီး အဲ့ဒီထဲမှာ အမျိုးသမီး ၄ ဦးလည်း ပါဝင်နေပါတယ်။
ခုလက်ရှိအခြေအနေမှာ သတင်းသမားတွေဟာ သတင်းမှန်ရရှိဖို့ လုပ်ဆောင်ရင်း ဖမ်းဆီးခံရတာတွေအပြင် ဖမ်းဆီးထိန်းသိမ်းခံထားရစဉ်အတွင်း သေဆုံးခဲ့ရတဲ့ သတင်းသမား ၇ ဦးအထိ ရှိလာနေပါတယ်။
ဒါကြောင့် မြန်မာ့မီဒီယာလောကအတွက် သတင်းလွတ်လပ်ခွင့်နဲ့ သတင်းသမားတွေရဲ့ ဘေးကင်းလုံခြုံရေးဟာ အရေးတကြီး ဖြေရှင်းရမယ့် စိန်ခေါ်မှုကြီး ဖြစ်နေဆဲ ဖြစ်ပါတယ်။
