Border News Agency
စစ်ကိုင်း၊မေ ၂၂။
အမျိုးသားညီညွတ်ရေးအစိုးရ (NUG) ပြည်ထောင်စုဝန်ကြီးချုပ် မန်းဝင်းခိုင်သန်းဟာ အစိုးရအဖွဲ့ဝင်တွေနဲ့ တွေ့ဆုံပြီး မဟာဗျူဟာမြောက်စစ်ဆင်ရေးကိစ္စတွေ၊ဖက်ဒရယ်ယူနစ်တွေနဲ့ ကြားကာလ ပြည်သူ့အုပ်ချုပ်ရေးကိစ္စတွေကို မေလ ၂၁ ရက်နေ့မှာ ဆွေးနွေးညှိနှိုင်းခဲ့ကြပါတယ်။
အဲဒီဖက်ဒရယ်ဒီမိုကရေစီပြည်ထောင်စု ပေါ်ထွန်းရေးဦးဆောင်ကောင်စီ (SCEF) ရဲ့ လုပ်ငန်းဆောင်ရွက်ချက်တွေအပြင် နိုင်ငံတကာဆက်ဆံရေး၊ကျန်းမာရေး၊ ပညာရေးနဲ့ လူသားချင်းစာနာမှုဆိုင်ရာ ကိစ္စရပ်တွေကိုလည်း ကဏ္ဍအလိုက် ထည့်သွင်းဆွေးနွေးခဲ့ကြတာပါ။
အဲဒီအစည်းအဝေးကို ပြည်ထဲရေးဒုဝန်ကြီးတွေဖြစ်တဲ့ ဒေါက်တာစိုင်းခိုင်မျိုးထွန်း၊ ဒေးဗစ်ဂွမ်အောင်တို့ တက်ရောက်ခဲ့ကြပါတယ်။
ဆွေးနွေးပွဲအပြီးမှာတော့ ပြည်ထောင်စုဝန်ကြီးချုပ်ဟာ စီမံဘဏ္ဍာဝန်ကြီး ဦးတင်ထွန်းနိုင်၊ မြန်မာ့နွေဦးဘဏ် (SDB) တာဝန်ရှိသူတွေ၊ လူ့အခွင့်အရေးဝန်ကြီး ဦးအောင်မျိုးမင်းနဲ့ ကာကွယ်ရေးဝန်ကြီးဌာနက တာဝန်ရှိသူတွေကိုလည်း သီးခြားစီ တွေ့ဆုံဆွေးနွေးခဲ့ပါသေးတယ်။
