Border News Agency
လွိုင်လင်၊ မေ ၂၅။
ရှမ်းပြည်တောင်ပိုင်း၊ လွိုင်လင်မြို့နယ်၊ ပင်လုံမြို့မှာ ငွေကျပ် ၈,၆၆၅ သိန်းကျော်တန်ဖိုးရှိတဲ့ ဘိန်းဖြူဘလောက်တုံးတွေနဲ့ စိတ်ပြောင်းဆေးဝါး Happy Water တွေကို မော်တော်ယာဉ်တစီးပေါ်ကနေ ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က မေလ ၂၅ ရက်၊ ဒီနေ့ထုတ်ပြန်ပါတယ်။
အဲဒီပင်လုံ – ကျောက်တန်း – တောင်ကြီးသွားကားလမ်းပေါ်မှာ မေလ ၂၁ ရက်၊ နေ့လည်၂ နာရီခွဲအချိန်မှာ ဟန်ထူးအောင်နဲ့မျိုးသူတို့မောင်းလာတဲ့ Toyota Fortuner အမျိုးအစားမော်တော်ယာဉ်ကို ရဲတပ်ဖွဲ့ကရပ်တန့်စစ်ဆေးခဲ့တယ်လို့ ဆိုပါတယ်။
အဲဒီယာဉ်ပေါ်ကနေ ဒေသကာလတန်ဖိုး ငွေကျပ် ၈,၅၆၈ သိန်းတန်ဖိုးရှိ ဘိန်းဖြူဘလောက်တုံး ၂၇၂ တုံးကို သိမ်းဆည်းရမိခဲ့တယ်လို့ ဆိုပါတယ်။
ဒါ့အပြင် ဒေသကာလတန်ဖိုး ငွေကျပ် ၁၀၀.၆၅ သိန်းတန်ဖိုးရှိ စိတ်ပြောင်းဆေးဝါး Happy Water အလေးချိန် ၁.၀၀၅ ကီလိုဂရမ်၊ လက်ကိုင်ဖုန်း ၃ လုံးနဲ့ မြန်မာငွေကျပ် ၁၅ သိန်းကိုလည်း ယာဉ်ပေါ်ကနေ တပြိုင်တည်းဖမ်းဆီးရမိခဲ့တယ်လို့ ဆိုပါတယ်။
အဲဒီမူးယစ်ဆေးဝါးတွေနဲ့အတူ ဖမ်းဆီးရမိသူ ဟန်ထူးအောင်နဲ့ မျိုးသူကိုကို ပင်လုံနယ်မြေရဲစခန်းမှာ ဥပဒေအရ အမှုဖွင့်အရေးယူထားရှိပြီး ကွင်းဆက်တွေကို ဆက်လက်ဖော်ထုတ်နေတယ်လို့ ဆိုပါတယ်။
