Border News Agency
မြောက်ဦး၊ဇွန် ၁၇။
အာရက္ခတပ်တော်(AA)ထိန်းချုပ်ထားတဲ့မြို့နယ်တချို့မှာ စတားလိန့်အင်တာနက်အသုံးပြုခွင့်ကို လုံခြုံရေးအရကန့် သတ်မှုတွေ လုပ်ထားတယ်လို့ အာရက္ခပြည်သူ့တော်လှန်ရေးအစိုးရရဲ့နည်းပ ညာဌာနက ပြောပါတယ်။
အဲဒါဟာ လက်ရှိဖြစ်ပွားနေတဲ့ စစ်ရေးအခြေအနေတွေကြောင့် သတင်းပေါက်ကြားမှုမရှိအောင် သတိထားကိုင်တွယ်နေတာကြောင်းလို့ဆိုပါတယ်။
”ဒီနေ့အချိန်၊အခြေအနေတွေအရ အာရက္ခပြည်ဟာရာနှုန်းပြည့် လုံခြုံငြိမ်းချမ်းနေတဲ့ ဒေသမဟုတ်သေးပါဘူး။လေကြောင်းကနေ ပစ်မှတ်ထားဗုံးကြဲတာမျိုးတွေ ရှိနေတာကြောင့် စစ်ရေးနဲ့ ပြည်သူ့လုံခြုံရေး သတင်းပေါက်ကြားမှုတွေ မရှိရအောင် သတိထား ကိုင်တွယ်နေရတာပါ။” လို့ နည်းပညာဌာန တာဝန်ရှိသူက ပြောပါတယ်။
အဲဒီလို ကန့်သတ်ထားတဲ့ မြို့နယ်တွေမှာ စတားလင့်ကို ပုဂ္ဂလိကပိုင်အဖြစ် သုံးချင်ရင်တော့ သက်ဆိုင်ရာ စစ်ဘက်နဲ့ လုံခြုံရေးဌာနတွေရဲ့ ထောက်ခံချက် လိုအပ်မှာဖြစ်ပါတယ်။
ဒါပေမယ့် ပြည်သူတွေရဲ့ ကျန်းမာရေး၊ ပညာ
ရေးနဲ့ လူမှုရေးကိစ္စတွေအတွက် အင်တာနက် လိုအပ်ချက်ကိုတော့ အစိုးရက အတတ်နိုင်ဆုံး ဖြည့်ဆည်းပေးသွားမယ်လို့ဆိုပါတယ်။
”လုံခြုံရေးအရကန့်သတ်ချက်တွေရှိပေမယ့် ပြည်သူတွေရဲ့လူသားချင်းစာနာမှု၊ မိသားစုဆက်သွယ်ရေး၊ ပညာရေးနဲ့ ကျန်းမာရေးကိစ္စတွေအတွက် လိုအပ်တဲ့ အင်တာနက်ဆက်သွယ်မှု ရနိုင်ဖို့ အများပြည်သူသုံးစင်တာ (PIAC) တွေကို အတတ်နိုင်ဆုံး ဖွင့်လှစ်ပေးထားပါတယ်။” လို့ သူက ရှင်းပြပါတယ်။
တိုက်ပွဲတွေ ပြင်းထန်နေတဲ့ နယ်မြေတွေမှာ လုံခြုံရေးအတွက် ခုလို စည်းကမ်းချက်တွေကို တင်းတင်းကျပ်ကျပ် ချမှတ်ထားတာလို့ ဆိုပါတယ်။
အင်တာနက် သုံးစွဲသူတွေအနေနဲ့လည်း အာရက္ခပြည်သူ့တော်လှန်ရေးအစိုးရရဲ့ လုံခြုံရေးဆိုင်ရာ လမ်းညွှန်ချက်တွေကို လိုက်နာပေးကြဖို့ တိုက်တွန်းထားပါတယ်။
