Border News Agency
မလေးရှား၊ သြဂုတ် ၅။
မလေးရှားနိုင်ငံ၊ ကိုတာဘာရူးမြို့ရှိ Lembah Sireh ဘတ်စ်ကားဂိတ်မှာ ကွာလာလမ်ပူသို့သွားရောက်ဖို့ အမြန်ဘတ်စ်ကားစောင့်ဆိုင်းနေတဲ့ မြန်မာနဲ့နီပေါတရားမဝင်လုပ်သားရှစ်ဦးကို သြဂုတ်လ ၅ ရက်၊ ဒီနေ့ မနက်မှာ မလေးရှားအထွေထွေရဲတပ်ဖွဲ့ (PGA) က ဖမ်းဆီးလိုက်ပါတယ်။
ဆောက်လုပ်ရေးလုပ်ကိုင်ဖို့ ကွာလာလမ်ပူသို့သွားမယ့် တရားမဝင်ဝင်ရောက်လာသူတွေကို မနက် ၇ နာရီ စစ်ဆေးမှုမှာ အမျိုးသားလေးဦးကို ပထမအကြိမ် ဖမ်းဆီးခဲ့တာပါ။
အဲဒီအပြင်နောက်ထပ် မော်တော်ယာဉ်တစီးနဲ့လာရောက်ချပေးခဲ့တဲ့ အမျိုးသမီးတဦးအပါအဝင် နီပေါနိုင်ငံသားလေးဦးကို ဒုတိယအကြိမ်ထပ်မံဖမ်းဆီးခဲ့တာ ဖြစ်ပါတယ်။
ဖမ်းဆီးခံရသူ မြန်မာအမျိုးသားတွေဟာ ခရီးစဉ်တခုလုံးနဲ့ကွာလာလမ်ပူမှာအလုပ်ရဖို့အတွက် တဦးကို မလေးရှားရင်းဂစ်တသောင်းခန့်ပေးခဲ့ရပြီး ထိုင်းနိုင်ငံကနေတဆင့် ကလန်းတန်မြစ်ကမ်းပါးရှိ တရားမဝင်ဆိပ်ကမ်းကနေ လှေနဲ့ကူးလာခဲ့ကြသူတွေဖြစ်ပါတယ်။
အဲဒီအပြင်နီပေါနိုင်ငံသားတွေကလည်း ခရီးစဉ်အတွက်တဦးကို ရင်းဂစ်ခုနှစ်ထောင်ခန့်ပေးခဲ့ရပြီး Tumpat၊ Kampung Baru Nelayan ကမ်းခြေကနေတဆင့် ဝင်ရောက်လာခဲ့ကြတာဖြစ်ပါတယ်။
အဲဒီဖမ်းဆီးခံရသူအားလုံးကို မလေးရှားလူဝင်မှုကြီးကြပ်ရေးဥပဒေနဲ့ စုံစမ်းစစ်ဆေးနေပါတယ်။
