Border News Agency
မြောက်ဦး၊ သြဂုတ် ၅။
အာရက္ခတပ်တော်(AA)ထိန်းချုပ်ထားတဲ့မြို့နယ်တွေကို အာဏာသိမ်းစစ်တပ်နေ့စဥ်ရက်ဆက် ပစ်ခတ်တိုက်ခိုက်နေတယ်လို့ သြဂုတ်လ ၅ ရက်၊ ဒီနေ့ အာရက္ခတပ်တော်ထုတ်ပြန်ပါတယ်။
အဲဒီကျောက်တော်၊မြောက်ဦး၊သံတွဲ၊ဂွ၊ ကျိန္တလီ၊ဝီရဌာနီ(ပေါက်တော)နဲ့ပုဏ္ဏားကျွန်း-စစ်တွေမြို့အစပ်နေရာတွေကို ပစ်ခတ်တိုက်ခိုက်နေတာလို့ဆိုပါတယ်။
အဲဒီမြို့တွေက အရပ်သားပြည်သူနေရာတွေ၊မြို့၊ရွာ၊ဆေးရုံ၊စာသင်ကျောင်း၊သာသနိကအဆောက်အအုံတွေကို လေကြောင်းတိုက်ခိုက်နေတာပါ။
အဲဒီလေယာဥ်အုပ်စုလိုက် နေ့ည၊အချိန်မရွေးဗုံးကြဲတိုက်ခိုက်နေသလို စစ်သင်္ဘောတွေက လက်နက်ကြီးတွေ ပစ်ခတ်တိုက်ခိုက်တာတွေ ဆက်တိုက်လုပ်နေတယ်လို့ ဆိုပါတယ်။
အဲဒါကြောင့် အာဏာသိမ်းစစ်တပ်ထိုးစစ်ဆင်ပြီး ထိုးဖောက်ဖို့ကြိုးစားနေတဲ့နေရာတိုင်းမှာ မြေပြင်တိုက်ပွဲတွေဆက်ဖြစ်နေပြီး လေကြောင်းတိုက်ခိုက်မှုတွေကိုသာ အရှိန်မြှင့်အားပြုတိုက်ခိုက်နေတယ်လို့ဆိုပါတယ်။
အာရက္ခတပ်တော်ထိန်းချုပ်ထားတဲ့ မြောက်ဦးမြို့ရှိအမှတ် ၅၄၀ ခြေမြန်တပ်ရင်းကို သြဂုတ်လ ၄ ရက်နေ့ ည ၉ နာရီအချိန်က အာဏာသိမ်းစစ်တပ်လေကြောင်းတိုက်ခိုက်ခဲ့ပါတယ်။
အဲဒီအပြင်သံတွဲမြို့နယ်ကိုလည်း အာဏာသိမ်းစစ်တပ်လေကြောင်းတိုက်ခိုက်တာတွေ မကြာခဏလုပ်နေတာမို့ ပြည်သူတွေသေဆုံးဒဏ်ရာရနေကြပါတယ်။
