Border News Agency
ဒီပဲယင်း၊ အောက်တိုဘာ ၉။
စစ်ကိုင်းဒေသ၊ ဒီပဲယင်းမြို့နယ်ရှိကျေးရွာကို အာဏာသိမ်းစစ်တပ်လေကြောင်းတိုက်ခိုက်လို့ မိသားစုဝင်လေးဦးမီးလောင်သေဆုံးသွားခဲ့တယ်လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့ (ပအဖ)က ထုတ်ပြန်ပါတယ်။
မူးကမ်းကြီးကျေးရွာကို အောက်တိုဘာလ ၈ ရက်၊နေ့လည် ၁ နာရီ ၁၈ မိနစ်အချိန်ခန့်က အာဏာသိမ်းစစ်တပ်ရဲ့ အနောက်မြောက်တိုင်းစစ်ဌာနချုပ် (နမခ) မှတက်လာတဲ့ ပါရာမော်တာနဲ့ဗုံးသီးနှစ်လုံးနဲ့တိုက်ခိုက်ခဲ့တာလို့ ဆိုပါတယ်။
အဲဒီဗုံးဟာမူးကမ်းကြီးကျေးရွာမှ ကိုစိုးနိုင်ရဲ့နေအိမ်ပေါ် သို့ ဗုံးကျရောက်ပေါက်ကွဲခဲ့တာကြောင့် အိမ်မှာရှိနေတဲ့ကိုစိုးနိုင်ရဲ့ ဇနီး၊သမီး၊ ညီမနဲ့ အစ်ကိုဖြစ်သူ စုစုပေါင်းလေးဦးစလုံးမီးလောင်သေဆုံးခဲ့တယ်လို့ ဆိုပါတယ်။
ဒေသခံပြည်သူတွေအနေနဲ့ လေကြောင်းသတင်းတွေနားစွင့်ပြီး စစ်တပ်ရဲ့ လေယာဉ်တွေတက်လာရင် ပုန်းခိုရာနေရာတွေမှာ အထူးဂရုစိုက်ရှောင်တိမ်းကြဖို့ကိုလည်း ဒီပဲယင်းမြို့နယ် ပအဖက သတိပေးတိုက်တွန်းထားပါတယ်။
