Border News Agency
ဖူးခက်၊ ဧပြီ ၄။
ထိုင်းနိုင်ငံ၊ ဖူးခက်နဲ့ ဖန်ငခရိုင်တွေမှာ ပါဆယ်ထုတ်တွေထဲက အိမ်သုံးလျှပ်စစ်ပစ္စည်းတွေထဲမှာ ဝှက်ပြီးပို့တဲ့ စိတ်ကြွဆေးပြား ၃ သိန်းကျော်ကို အာဏာပိုင်တွေက ဧပြီလ ၃ ရက်နေ့ကဖမ်းဆီးခဲ့ပါတယ်။
အဲဒီစစ်ဆင်ရေးကို မူးယစ်ဆေးဝါးထိန်းချုပ်ရေးအဖွဲ့ (PPS.) နဲ့ ရဲတပ်ဖွဲ့ဝင်တွေ ပူးပေါင်းပြီး မတ်လ ၃၀ ကနေ ဧပြီ ၃ ရက်အထိ လုပ်ဆောင်ခဲ့တာပါ။
နခွန်ပထုံကနေ ပို့လိုက်တဲ့ အဲကွန်းပန်ကာနဲ့ တခြားအိမ်သုံးပစ္စည်းတွေထဲမှာ စိတ်ကြွဆေးပြား ၃၂၀,၀၀၀ (၃ သိန်း ၂ သောင်း) ကို သေချာထည့်သွင်းဝှက်ထားတာကို ရှာဖွေတွေ့ရှိခဲ့တာ ဖြစ်ပါတယ်။
ဒီအမှုနဲ့ပတ်သက်ပြီး တရားခံ ၂ ဦးကို ဖမ်းဆီးထားသလို၊ ဘတ် ၉ သိန်း (မြန်မာငွေ သိန်း ၉၀၀ ကျော်) တန်ဖိုးရှိတဲ့ ပိုင်ဆိုင်မှုတွေကိုလည်း သက်သေအဖြစ် သိမ်းဆည်းထားပါတယ်။
အခုဖမ်းမိတဲ့ဂိုဏ်းဟာ အာဏာပိုင်တွေ မျက်စိလည်အောင် ပါဆယ်ပို့ဆောင်ရေးစနစ်ကို အသုံးပြုခဲ့တာဖြစ်ပြီး ကျန်ရှိနေတဲ့ ကွင်းဆက်တွေကိုလည်း ဆက်လက်စုံစမ်းနေတယ်လို့ သိရပါတယ်။
