Border News Agency
မကွေး၊ မေ ၃။
မကွေးတိုင်း၊စလင်းမြို့နယ်က ကျေးရွာတွေကို မေလ ၁ ရက်နေ့မှာ အာဏာသိမ်းစစ်တပ်က စစ်ကြောင်းထိုးဝင်ရောက်ပြီး အကြောင်းမဲ့ မီးရှို့ဖျက်ဆီးခဲ့တာကြောင့် အဘွားအို နှစ်ဦးနဲ့ အမျိုးသားတဦး သေဆုံးသွားတယ်လို့ သိရပါတယ်။
အာဏာသိမ်းစစ်တပ်ရဲ့တပ်မ ၁၀၁လက်အောက်ခံ ခလရ ၂၅၃၊ ၂၅၄ နဲ့ ၂၅၅ တပ်ရင်းတွေဟာ တိုက်ပွဲဖြစ်ပွားတာမရှိဘဲ ထနောင်းကုန်း၊ ကံစွယ်၊သနပ်ကုန်းနဲ့ ကြူဝန်းကျေးရွာတွေကို ဝင်ရောက်မီးရှို့ခဲ့တာ ဖြစ်ပါတယ်။
အဲဒီမီးရှို့မှုအတွင်း အိုမင်းမစွမ်းဖြစ်နေတဲ့ အဘွားအို နှစ်ဦး မီးလောင်သေဆုံးခဲ့ရသလို အပြစ်မဲ့ အရပ်သားအမျိုးသား တဦးလည်း အာဏာသိမ်းစစ်တပ်ရဲ့ သေနတ်နဲ့ ပစ်ခတ်သတ်ဖြတ်တာ ခံခဲ့ရပါတယ်။
အဲဒီလို မီးလောင်မှုကြောင့် ထနောင်းကုန်းကျေးရွာမှာ ရွာလုံးကျွတ်နီးပါး ပြာကျသွားသလို သနပ်ကုန်းရွာနဲ့ ကြူဝန်းရွာတွေက နေအိမ်တွေ၊ ဆက်သွယ်ရေးတာဝါတိုင်အနီးက အဆောက်အအုံတွေလည်း ပျက်စီးဆုံးရှုံးခဲ့ပါတယ်။
ဒါ့အပြင် ဒေသခံတွေ မွေးမြူထားတဲ့ ကျွဲ၊ နွား၊ ဝက်တွေနဲ့ သိုလှောင်ထားတဲ့ သီးနှံတွေအားလုံး မီးထဲပါသွားခဲ့ပြီး လက်ရှိမှာတော့ ထိခိုက်ပျက်စီးမှု အသေးစိတ်ကို ဆက်လက်ကောက်ယူနေဆဲ ဖြစ်ပါတယ်။
