Border News Agency
ထိုင်း၊မေ ၁၄။
ထိုင်း-မြန်မာနယ်စပ်၊ချင်းမိုင်ခရိုင်၊မယ်အိုင်မြို့နယ်အတွင်းမှာ ဖာမိူင်းစစ်ဆင်ရေးတပ်ဖွဲ့နဲ့ မူးယစ်ဆေးဝါးမှောင်ခိုအဖွဲ့တို့ မေလ ၁၂ ရက် ၊ညပိုင်းက ပစ်ခတ်မှုဖြစ်ပွားခဲ့ပြီး မှောင်ခိုအဖွဲ့ဘက်က တဦးသေဆုံးကာ မူးယစ်ဆေးဝါး အမြောက်အမြား သိမ်းဆည်းရမိခဲ့တယ်လို့ သိရပါတယ်။
အဲဒီမယ်အိုင်မြို့နယ်၊သာတွန်ကျေးရွာအုပ်စုအတွင်း ကင်းလှည့်နေတဲ့ အမှတ် ၃၂၀၉ ခြေလျင်တပ်ခွဲနဲ့ အထူးကင်းလှည့်အဖွဲ့ဟာမေလ၁၂ ရက်၊ည ၉ နာရီခန့်မှာ သံသယဖြစ်ဖွယ် လူ ၅ ဦးကနေ ၁၀ ဦးခန့်ကို တွေ့ရှိခဲ့တာပါ။
အဲဒီအပြင် စစ်ဆေးဖို့ ကြိုးစားချိန်မှာ မှောင်ခိုအဖွဲ့ဘက်က စတင်ပစ်ခတ်ခဲ့တာကြောင့် ၅ မိနစ်ခန့် အပြန်အလှန် ပစ်ခတ်မှု ဖြစ်ပွားခဲ့တယ်လို့ ဆိုပါတယ်။
အဲဒီ ပစ်ခတ်မှုအပြီး မေလ ၁၃ ရက်၊ မနက်မှာ အခင်းဖြစ်နေရာကို ပြန်လည်စစ်ဆေးခဲ့ရာ မှောင်ခိုအဖွဲ့ဝင်တဦး သေဆုံးနေတာကို တွေ့ရှိခဲ့တယ်လို့ဆိုပါတယ်။
ဒါ့အပြင် ကျောပိုးအိတ်အဖြစ် ပြုလုပ်ထားတဲ့ ဆာလာအိတ် ၃ အိတ်ကိုလည်း သိမ်းဆည်းရမိခဲ့တာပါ။
အဲဒီအိတ်တွေအတွင်းမှာ စိတ်ကြွဆေးပြားစုစုပေါင်း ၂၅၀,၀၀၀ ပြားနဲ့ အလေးချိန် ၁၁.၂ ကီလိုဂရမ်ခန့်ရှိတဲ့ ဘိန်းစိမ်းတွေကို ရှာတွေ့ရှိခဲ့တယ်လို့ဆိုပါတယ်။
ဒါ့အပြင် တူမီးသေနတ် တလက်၊ ကျည်ခွံအချို့နဲ့ ဖုန်းတလုံးကိုလည်း သိမ်းဆည်းရမိခဲ့တယ်လို့ ဆိုပါတယ်။
အဲဒီသိမ်းဆည်းရမိတဲ့ မူးယစ်ဆေးဝါးတွေနဲ့ သက်သေခံပစ္စည်းအားလုံးကို ဥပဒေအရ ဆက်လက်အရေးယူနိုင်ဖို့ မယ်အိုင်ရဲစခန်းကို လွှဲပြောင်းထားတယ်လို့ဆိုပါတယ်။
