Border News Agency
တရုတ်၊ မေ ၁၄။
တရုတ်ဟာအမေရိကန်ရဲ့ အဓိကပြိုင်ဘက်ဖြစ်သလို ဆက်ဆံရေးတည်ဆောက်ဖို့ အရေးအကြီးဆုံးနိုင်ငံလည်းဖြစ်တယ်လို့ အမေရိကန်နိုင်ငံခြားရေးဝန်ကြီး မာကိုရူဘီရိုက ပြောလိုက်ပါတယ်။
သမ္မတထရမ့်ရဲ့ တရုတ်ခရီးစဉ်အတွင်း Fox သတင်းဌာနနဲ့ အင်တာဗျူးမှာ အခုလို မှတ်ချက်ပေးခဲ့တာပါ။
ရူဘီရိုကတရုတ်ကို ရန်သူလိုမြင်ကြတာမမှားပေမယ့် တဖက်မှာလည်း တရုတ်ဟာဆက်ပြီးကြီးထွားလာမယ့် နိုင်ငံကြီးဖြစ်တယ်လို့ ဆိုပါတယ်။
အကျိုးစီးပွားချင်း ပွတ်တိုက်မှုတွေရှိနိုင်ပေမယ့် စစ်ပွဲတွေကိုရှောင်ဖို့နဲ့ ကမ္ဘာကြီးတည်ငြိမ်ဖို့အတွက် အဲဒီပွတ်တိုက်မှုတွေကို စီမံခန့်ခွဲဖို့လိုတယ်လို့ သူကထောက်ပြပါတယ်။
ဒါ့အပြင်နှစ်နိုင်ငံကြား ပူးပေါင်းဆောင်ရွက်နိုင်မယ့် အခွင့်အလမ်းတွေကို မျက်ကွယ်မပြုဖို့လည်း အရေးကြီးတယ်လို့ ဝန်ကြီးက သတိပေးပါတယ်။
အထူးသဖြင့် အီရန်ကဟောမုဇ်ရေလက်ကြားကို ပိတ်ထားတဲ့ကိစ္စမှာတရုတ်ဆီက ပိုပြီးတက်ကြွတဲ့ ပူးပေါင်းပါဝင်မှုမျိုးကို အမေရိကန်က မျှော်လင့်နေတာပါ။
ဒီရေလမ်းကြောင်း ပြန်ဖွင့်နိုင်ရေးဟာ တရုတ်ရဲ့အကျိုးစီးပွားနဲ့လည်း ဆက်စပ်နေတယ်လို့ ရူဘီရိုကဆိုပါတယ်။
အီရန်ဟာ တရုတ်နဲ့ရင်းနှီးပြီး ရေနံတွေအများဆုံးရောင်းနေတဲ့ မိတ်ဖက်ဖြစ်တာကြောင့် အီရန်ကိုညှိနှိုင်းစည်းရုံးပေးဖို့ အမေရိကန်က လိုလားနေတာပါ။
ဟောမုဇ်ရေလက်ကြားအပိတ်ခံရလို့ အထိနာဆုံးကတော့ စွမ်းအင်အတွက်ဒီလမ်းကြောင်းကို မှီခိုနေရတဲ့အာရှတိုက်ပဲ ဖြစ်ပါတယ်။
ဒါကြောင့် ဒေသတွင်းတည်ငြိမ်ရေးအတွက် တရုတ်ရဲ့အခန်းကဏ္ဍဟာ အခုအချိန်မှာအလွန်ပဲအရေးကြီးနေတာဖြစ်ပါတယ်။
