Border News Agency
မလေးရှား၊ နိုဝင်ဘာ ၁၂။
မလေးရှားနိုင်ငံ၊ကဒါးပြည်နယ်၊အလော်စတားမြို့ရှိ လူကုန်ကူးဂိုဏ်းတခုကို လူဝင်မှုကြီးကြပ်ရေးဦးစီးဌာနက ဝင်ရောက်စီးနင်းခဲ့ရာ အင်ဒိုနီးရှားအမျိုးသမီးတဆယ့်ခြောက်ဦးကို ကယ်တင်နိုင်ခဲ့ပြီး မလေးရှားအမျိုးသားနှစ်ဦးကို ဖမ်းဆီးရမိခဲ့ပါတယ်။
အလော်စတားမြို့၊Taman Desa Baiduri ရပ်ကွက်ရှိ အဆောက်အအုံတခုကို နိုဝင်ဘာလ ၁၀ ရက်နေ့က လူကုန်ကူးမှုတိုက်ဖျက်ရေးဥပဒေနဲ့ ဝင်ရောက်စီးနင်းရှာဖွေခဲ့တာပါ။
စစ်ဆင်ရေးအတွင်း လူကုန်ကူးမှုနဲ့ ဆက်စပ်နေတဲ့ သက်သေခံပစ္စည်းတွေအဖြစ် မော်တော်ယာဉ် နှစ်စီး၊ အင်ဒိုနီးရှား နိုင်ငံကူးလက်မှတ်သုံးဆယ့်သုံးအုပ်နဲ့ ငွေသားရင်းဂစ် တသိန်းနှစ်သောင်းနှစ်ထောင့်ငါးရာကိုးဆယ့်ရှစ် တို့ကိုလည်း သိမ်းဆည်းရမိခဲ့ပါတယ်။
အဲဒီကယ်တင်နိုင်ခဲ့တဲ့ အမျိုးသမီး တဆယ့်ခြောက် ဦးနဲ့ သံသယရှိသူ မလေးရှားနိုင်ငံသားနှစ်ဦးတို့ကို ဥပဒေနဲ့အညီ ဆက်လက်အရေးယူနိုင်ဖို့ ကဒါးပြည်နယ် လူဝင်မှုကြီးကြပ်ရေးဦးစီးဌာနသို့ ခေါ်ဆောင်သွားပြီလို့ ဆိုပါတယ်။
