Border News Agency
အမေရိကန်၊ဧပြီ ၂၃။
အီရန်ရဲ့ ဒရုန်းတိုက်ခိုက်မှုတွေကို ကာကွယ်နိုင်ဖို့အတွက် အမေရိကန်စစ်တပ်ဟာ ယူကရိန်းနိုင်ငံထုတ် Sky Map ဒရုန်းရန်ကာကွယ်ရေးနည်းပညာကို ဆော်ဒီအာရေဗျရှိ အမေရိကန်လေတပ်စခန်းမှာ စတင်အသုံးပြုနေပြီလို့ သိရပါတယ်။
ရုရှားနဲ့ ၄ နှစ်ကြာစစ်ပွဲအတွင်း စမ်းသပ်အောင်မြင်ထားတဲ့ ဒီနည်းပညာဟာ အီရန်လုပ် Shahed ဒရုန်းတွေကို ထောက်လှမ်းဖမ်းဆီးရာမှာ အလွန်ထိရောက်တာကြောင့် အမေရိကန်စစ်သည်တွေကို သင်တန်းပေးဖို့ ယူကရိန်းစစ်ဘက်တာဝန်ရှိသူတွေ ကိုယ်တိုင် လာရောက်ခဲ့ကြတာပါ။
ပြီးခဲ့တဲ့လက သမ္မတထရန့်က ယူကရိန်းရဲ့ ဒရုန်းကာကွယ်ရေးအကူအညီကို မလိုအပ်ဘူးလို့ လူသိရှင်ကြား ငြင်းဆိုခဲ့ပေမယ့် အခုလို ယူကရိန်းနည်းပညာကို အားကိုးနေရတာဟာ အမေရိကန်ရဲ့ လေကြောင်းရန်ကာကွယ်ရေးမှာ အားနည်းချက်ရှိနေတာကို ဖော်ပြနေတယ်လို့ ကျွမ်းကျင်သူတွေက ဆိုပါတယ်။
အမေရိကန်ဟာ Operation Epic Fury စီမံချက်အတွက် ဒေါ်လာ ၃၅၀ သန်း သုံးစွဲနေပေမဲ့ ဒရုန်းရန်သူအားလုံးကို တားဆီးနိုင်တဲ့ တခုတည်းသော လက်နက်မရှိသေးတာကြောင့် အခုလို ယူကရိန်းရဲ့ Sky Map ကို ပူးပေါင်းအသုံးပြုလာတာ ဖြစ်ပါတယ်။
အီရန်စစ်တပ်က အသုံးပြုနေတဲ့ ဒရုန်းတွေကို ထိထိရောက်ရောက် တားဆီးနိုင်ဖို့အတွက် အမေရိကန်စစ်ဌာနချုပ်က ဒီနည်းပညာကို အဓိကထား အသုံးချနေပါတယ်။
