Border News Agency
အီရန်၊မေ ၁၆။
အီရန်နိုင်ငံအနေနဲ့ အမေရိကန်အစိုးရအပေါ် ယုံကြည်မှု လုံးဝမရှိဘဲအမေရိကန်ဘက်ကတကယ်အလေးအနက်ထားမှသာ ဆွေးနွေးမှုတွေလုပ်ဆောင်သွားမယ်လို့ အီရန်နိုင်ငံခြားရေးဝန်ကြီး အဘတ်စ်အာရတ်ချီက မေလ ၁၅ ရက်၊မနေ့ကပြောကြားလိုက်ပါတယ်။
နယူးဒေလီမြို့မှာပြုလုပ်တဲ့ သတင်းစာရှင်းလင်းပွဲအတွင်း အာရတ်ချီက အမေရိကန်ဘက်က သတင်းစကားတွေဟာ ရှေ့နောက်မညီဘဲ ဝေဝါးနေတာကြောင့် ဆွေးနွေးပွဲတွေ ရှေ့မတိုးနိုင်ဘဲ ဖြစ်နေရတာလို့ ဆိုပါတယ်။
ဗျူဟာမြောက် ဟောမုဇ်ရေလက်ကြားနဲ့ ပတ်သက်ပြီးတော့လည်း အီရန်နဲ့ စစ်မဖြစ်နေတဲ့ သင်္ဘောတွေအနေနဲ့ အီရန်ရေတပ်နဲ့ ညှိနှိုင်းပြီး ဖြတ်သန်းနိုင်ပေမယ့် လက်ရှိအခြေအနေကတော့ တော်တော်လေး ရှုပ်ထွေးနေဆဲ ဖြစ်တယ်လို့ သူက ဆက်ပြောပါတယ်။
ဒါ့အပြင် အီရန်ဟာ တရုတ်နိုင်ငံကို မဟာဗျူဟာမြောက် မိတ်ဖက်အဖြစ် သတ်မှတ်ထားပြီး စစ်ပွဲအဆုံးသတ်ရေးအတွက် တရုတ်ရဲ့ ကြားဝင်စေ့စပ်ပေးမှုတွေကို ကြိုဆိုသွားမယ်လို့လည်း အာရတ်ချီက အရိပ်အမြွက် ပြောဆိုခဲ့ပါတယ်။
အီရန်အနေနဲ့ သံတမန်ရေးရာနည်းလမ်းကို အခွင့်အရေးပေးဖို့ အပစ်အခတ်ရပ်စဲရေးကို ထိန်းသိမ်းထားပေမယ့်ဆွေးနွေးပွဲတွေ ကျရှုံးခဲ့ရင်တော့ ပြန်လည်တိုက်ခိုက်ဖို့ အသင့်ရှိနေတယ်လို့လည်း သတိပေးထားပါတယ်။
