Border News Agency
နေပြည်တော်၊ ဇွန် ၁၁။
အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှုညှိနှိုင်းရေးကော်မတီနဲ့ NCA လက်မှတ်ရေးထိုးထားတဲ့ တိုင်းရင်းသားလက်နက်ကိုင်အဖွဲ့ (NCA-S EAOs) တို့ နေပြည်တော်မှာ နှစ်ရက်ကြာအလွတ်သဘောတွေ့ဆုံဆွေးနွေးခဲ့ကြတယ်လို့ အာဏာသိမ်းစစ်တပ်က ဇွန်လ ၁၁ရက်၊ ဒီနေ့ထုတ်ပြန်ပါတယ်။
အဲဒီဆွေးနွေးပွဲမှာ အဓိကအားဖြင့် NCA လမ်းကြောင်းကနေထွက်ခွာသွားတဲ့ တိုင်းရင်းသားလက်နက်ကိုင်အဖွဲ့တွေကို ပြန်လည်ပါဝင်လာအောင် ဘယ်လိုလုပ်မလဲဆိုတာကို ဆွေးနွေးခဲ့ကြတယ်လို့ဆိုပါတယ်။
အဲဒီအပြင် ၂၀၀၈ ဖွဲ့စည်းပုံအခြေခံဥပဒေထဲက ပြင်ဆင်သင့်တဲ့အချက် ၄၃ ချက်ကို လွှတ်တော်မှာ ဘယ်လိုတင်သွင်းမလဲဆိုတာ၊ ငြိမ်းချမ်းရေးလုပ်ငန်းစဉ်တွေကို ပိုထိရောက်အောင် ဘယ်လိုပူးပေါင်းမလဲဆိုတာနဲ့ ကြိုတင်သတ်မှတ်ချက်မပါတဲ့ ပစ်ခတ်တိုက်ခိုက်မှုရပ်စဲရေးကြေညာချက်တွေ ထုတ်ပြန်နိုင်ဖို့ ကိစ္စတွေကိုလည်း ဆွေးနွေးခဲ့ကြတယ်လို့ဆိုပါတယ်။
ဆွေးနွေးပွဲအပြီးမှာတော့ အခုနှစ်ရက်တာ ဆွေးနွေးရရှိတဲ့အချက်တွေကို နှစ်ဖက်မှတ်တမ်းတင်လက်မှတ်ရေးထိုးခဲ့ကြပြီး ရှေ့ဆက်ပြီးတော့လည်း ငြိမ်းချမ်းရေးအတွက် ဆက်လက်ပူးပေါင်းသွားဖို့ သဘောတူထားကြတယ်လို့လည်းဆိုပါတယ်။
လက်ရှိကာလမှာတိုင်းပြည်ရဲ့ နိုင်ငံရေး၊ စစ်ရေးအခင်းအကျင်းဟာ အလွန်ရှုပ်ထွေးနေတာမို့ အခုလို ဆွေးနွေးပွဲတွေကနေ မြေပြင်အမှန်တကယ် အကျိုးသက်ရောက်မှုရှိတဲ့ ငြိမ်းချမ်းရေးရလဒ်တွေကို ဘယ်လောက်အထိ ဖော်ဆောင်နိုင်မလဲဆိုတာ စောင့်ကြည့်ရမှာဖြစ်ပါတယ်။
အဲဒီအပြင်အဖွဲ့အစည်းအချင်းချင်းကြား ယုံကြည်မှုတည်ဆောက်တာနဲ့ လက်ရှိဖြစ်ပွားနေတဲ့ပဋိပက္ခတွေကို အဆုံးသတ်နိုင်ဖို့အတွက် စစ်မှန်တဲ့နိုင်ငံရေးဆွေးနွေးမှုတွေကသာ အဓိကသော့ချက်ဖြစ်လာနိုင်လို့ နိုင်ငံရေးလေ့လာသူတွေက သုံးသပ်ထားကြပါတယ်။
