Border News Agency
နယူးဒေလီ၊ဇူလိုင် ၂၂။
အိန္ဒိယနိုင်ငံ၊နယူးဒေလီမြို့မှာ စာမေးပွဲ မေးခွန်း ပေါက်ကြားမှုနဲ့ ပတ်သက်ပြီးပညာရေးဝန်ကြီး နှုတ်ထွက်ပေးဖို့ ဆန္ဒပြတောင်းဆိုနေတဲ့ ကျောင်းသား ထောင်ပေါင်းများစွာကို ရဲတပ်ဖွဲ့က မျက်ရည်ယိုဗုံးတွေ သုံးပြီး အကြမ်းဖက်ဖြိုခွင်းခဲ့တာကြောင့် ကျောင်းသားတရာကျော် ဒဏ်ရာရသွားခဲ့ပါတယ်။
အဲဒီဆန္ဒပြပွဲကို ဇူလိုင် လ၂၀ ရက်နေ့က ပါလီမန်အဆောက်အအုံအနီးမှာ ပြုလုပ်ခဲ့ကြတာဖြစ်ပြီး အိန္ဒိယပညာရေးဝန်ကြီး Dharmendra Pradhan နှုတ်ထွက်ပေးဖို့၊ ဖမ်းဆီးခံထားရတဲ့ တက်ကြွလှုပ်ရှားသူ Sonam Wangchuk ကို ပြန်လွှတ်ပေးဖို့နဲ စာမေးပွဲ ပြဿနာကြောင့် သေဆုံးသွားခဲ့ရတဲ့ ကျောင်းသားမိသားစုတွေကို လျော်ကြေးပေးဖို့ တောင်းဆိုခဲ့ကြတာပါ။
ပြီးခဲ့တဲ့ လတွေအတွင်း အိန္ဒိယနိုင်ငံမှာ တက္ကသိုလ်ဝင်ခွင့်နဲ့ အစိုးရဝန်ထမ်း စာမေးပွဲ မေးခွန်းတွေ ဆက်တိုက်ပေါက်ကြားခဲ့တာကြောင့် ကျောင်းသား သန်းပေါင်းများစွာ ထိခိုက်ခဲ့ရပြီး ကျောင်းသားနှစ်ဆယ်ထက်မနည်း စိတ်ဓာတ်ကျကာ အဆုံးစီရင်ခဲ့ကြပါတယ်။
အဲဒီဖြိုခွင်းမှုနဲ ပတ်သက်ပြီး ရဲတပ်ဖွဲ့က ဆန္ဒပြသူတွေကို အကြမ်းဖက်မှု၊ ကျောက်ခဲနဲ့ပစ်ပေါက်တာ၊ပစ္စည်းတွေကိုဖျက်ဆီးတာတွေ၊အမှုပေါင်းငါးမှုထက်မနည်း ဖွင့်လှစ်ထားပါတယ်။
ဒါပေမယ့်လည်း ဆန္ဒပြသူတွေနဲ့CJP အဖွဲ့ ဦးဆောင်သူတွေကတော့ ပညာရေးဝန်ကြီး နှုတ်ထွက်ပေးသည်အထိ ဆန္ဒပြတာတွေကို နောက်မဆုတ်ဘဲ ဆက်လက် လုပ်ဆောင်သွားမယ်လို့ ပြောဆိုထားပါတယ်။
