Border News Agency
နေပြည်တော်၊သြဂုတ် ၁၉။
အာဏာသိမ်းစစ်ခေါင်းဆောင်မင်းအောင်လှိုင်ရဲ့ခရီးစဥ်တွေမှာ လုံခြုံရေးယူပေးရတဲ့ဝန်ထမ်းတွေအပါအဝင် နေပြည်တော်ဝန်ထမ်းတွေဟာ ကျွဲဂိမ်းကစားနေကြတယ်လို့ နေပြည်တော်ဝန်ထမ်းအသိုင်းအဝိုင်းက အတည်ပြုပြောကြပါတယ်။
အဲဒီအပြင် နိုင်ငံတော်သမ္မတရုံးဝန်ထမ်းတွေလည်း ကျွဲဂိမ်းကစားနေပြီး လူကြီးခရီးစဥ်တွေရှိနေပေမယ့် နားချိန်ခဏလေးရတာမှာတောင် ကျွဲဂိမ်းကစားနေကြတာလို့ ဆိုကြပါတယ်။
“မအလလုံခြုံရေးတွေလည်း အားရင်အားတိုင်းကျွဲဂိမ်းကစားနေကြတာကို တွေ့နေရပါတယ်။ သမ္မတရုံးကဝန်ထမ်းတွေလည်းပါပါတယ်။ နေပြည်တော်ကဝန်ထမ်းတော်တော်များများကျွဲဂိမ်းကစားနေကြပါတယ်။”လို့ နေပြည်တော်မှအရာရှိတဦးက Border News Agencyကို ပြောပါတယ်။
အဲဒီကျွဲဂိမ်းအပါအဝင် အွန်လိုင်းလောင်းကစားဂိမ်းတွေကို ဥပဒေအရတားမြစ်ထားပေမယ့် နိုင်ငံတော်အဆင့်လုံခြုံရေးတာဝန်ရှိသူတွေ၊ ဝန်ထမ်းတွေထိကစားနေကြပေမယ့် စစ်ဆေးအရေးယူတာမရှိဘူးလို့ နေပြည်တော်ဝန်ထမ်းအသိုင်းအဝိုင်းက ဆိုကြပါတယ်။
အဲဒါကြောင့်ကျားဖြန့်အပါအဝင် အွန်လိုင်းလောင်းကစားဂိမ်းတွေမှာ နိုင်ငံတော်အဆင့်လုံခြုံရေးအရာရှိကြီးတွေ ပါနေသလားသံသယဖြစ်မိတယ်လို့ နေပြည်တော်ဝန်ထမ်းအသိုင်းအဝိုင်းက ဆိုကြပါတယ်။
“လူကြီးခရီးစဥ်တွေမှာတောင် လုံခြုံရေးတွေကျွဲဂိမ်းကစားနေကြတာပါ။ ဘယ်သူမှစစ်ဆေးအရေးယူတာတွေမရှိကြပါဘူး။ နိုင်ငံတော်အဆင့်လုံခြုံရေးအရာရှိကြီးတွေလည်း ကျားဖြန့်တွေလိုပါနေသလားမသိပါဘူး။”လို့ သမ္မတရုံးမှအရာရှိတဦးက Border News Agency ကို ပြောပါတယ်။
အဲဒီကျွဲဂိမ်းမှာ အာဏာသိမ်းစစ်ခေါင်းဆောင်မင်းအောင်လှိုင်ကို လုံခြုံရေးယူပေးနေရသူတွေပိုကစားနေကြပြီး ငွေကြေးသိန်းရာချီရှုံးနေကြတာကိုလည်းကြားသိနေကြရတယ်လို့ ဆိုကြပါတယ် ။
အဲဒီကျွဲဂိမ်းရှုံးတဲ့အရာရှိတွေ၊ ဝန်ထမ်းတွေဟာ အာဏာပါဝါပြငွေကြေးတောင်းယူနေကြတာတွေအပါအဝင် အကျင့်ပျက်ခြစားတာတွေလည်း ကျူးလွန်နေကြတယ်လို့ နေပြည်တော်ဝန်ထမ်းအသိုင်းအဝိုင်းက ဆိုကြပါတယ်။
