​Border News Agency
ရန်ကုန်၊ စက်တင်ဘာ ၂၅။

​ကျေးလက်ဒေသဖွံ့ဖြိုးတိုးတက်ရေးဦးစီးဌာနကဆောင်ရွက်နေတဲ့ မြစိမ်းရောင်ကျေးရွာစီမံကိန်းအမည်ကိုသုံးပြီး Facebook နဲ့ TikTok စတဲ့ လူမှုကွန်ရက်တွေကနေ ငွေကြေးလိမ်လည်ဖို့ ကြိုးပမ်းတာတွေ ရှိနေလို့ အထူးဂရုပြုကြဖို့ သမဝါယမနဲ့ကျေးလက်ဖွံ့ဖြိုးရေးဝန်ကြီးဌာနက အသိပေးထားပါတယ်။

​ဦးစီးဌာနရဲ့ ရုံးပုံတွေ၊ Logo တွေနဲ့ ဝန်ထမ်းတွေ ကျေးရွာမှာ ရန်ပုံငွေ ထုတ်ချေးနေတဲ့ မှတ်တမ်းပုံတွေကို Photoshop နဲ့ ပြုပြင်ကာ လူမှုကွန်ရက်အကောင့်အချို့ကနေ ငွေကြေးလိမ်လည်ဖို့လုပ်ဆောင်နေတာကို စိစစ်တွေ့ရှိခဲ့ရတာပါ။

​မြစိမ်းရောင်ကျေးရွာစီမံကိန်းဟာ ကျေးလက်နေပြည်သူတွေရဲ့ မိသားစုဝင်ငွေတိုးပွားရေးနဲ့ ဆင်းရဲမှုနှုန်းလျှော့ချရေးအတွက် ဆောင်ရွက်ပေးနေတာဖြစ်ပြီး စီမံကိန်းကျေးရွာတွေကိုစံနှုန်းတွေနဲ့အညီ မြို့နယ်ကော်မတီတွေက အဆင့်ဆင့် စိစစ်ရွေးချယ်တာ ဖြစ်ပါတယ်။

အဲဒီအပြင် စီမံကိန်းရန်ပုံငွေကို ကျေးရွာလူထုကိုယ်တိုင်စီမံခန့်ခွဲတာဖြစ်လို့ အသင်းသူ/အသင်းသားတွေအနေနဲ့ ရန်ပုံငွေရဖို့ငွေကြေးတစုံတရာ ပေးဆောင်ရတာမရှိပါဘူး။

​မြစိမ်းရောင်စီမံကိန်းအနေနဲ့ Facebook နဲ့ TikTok အပါအဝင် အွန်လိုင်းလူမှုကွန်ရက်တွေကနေ ချေးငွေထုတ်ချေးပေးတာ လုံးဝမရှိတဲ့အတွက် အွန်လိုင်းကနေ ငွေကြေးတောင်းခံမှုတွေကို အထူးသတိထားကြဖို့လည်း သတိပေးထားပါတယ်။

​စီမံကိန်းဆောင်ရွက်လိုတဲ့ ကျေးရွာတွေအနေနဲ့ သက်ဆိုင်ရာ မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနသို့ တိုက်ရိုက်ဆက်သွယ် ဆောင်ရွက်နိုင်တယ်လို့ဆိုပါတယ်။