Border News Agency
စစ်တွေ၊ဩဂုတ် ၁၅။
စစ်တွေခရိုင်အချုပ်ထောင်မှထွက်ပြေးလွတ်မြောက်နေတဲ့ မုဒိမ်းမှုတရားခံကျော်ဝင်းချေကိုဖမ်းဆီးပေးခဲ့သူ ပြင်ဝန်းကျေးရွာအုပ်ချုပ်ရေးမှူးဦးဆန်းတင်အောင်အား ရက္ခိုင်အမျိုးသားအဖွဲ့ချုပ် (ULA) ကဩဂုတ်လ ၁၄ ရက်နေ့မှာ ဂုဏ်ပြုငွေဆယ်သိန်းထောက်ပံ့ပေးခဲ့ပါတယ်။
မုဒိမ်းမှုတရားခံကျော်ဝင်းချေနဲ့ အခြားတရားခံဘိုသန်းဝင်းတို့နှစ်ဦးဟာ ပြီးခဲ့တဲ့ မေလ ၇ ရက်၊ညနေပိုင်းက စစ်တွေခရိုင်အတွင်းရှိ အချုပ်ထောင်တခုမှ ထွက်ပြေးသွားခဲ့ကြတာပါ။
အဲဒီထွက်ပြေးသူတွေထဲမှ ကျော်ဝင်းချေကို ပြီးခဲ့တဲ့ ဇူလိုင်လ ၂၆ ရက်၊ညပိုင်းမှာ မြေပုံမြို့နယ်၊ပြင်ဝန်းကျေးရွာအုပ်ချုပ်ရေးမှူး ဦးဆန်းတင်အောင် ကိုယ်တိုင် လက်ရဖမ်းဆီးပြီး သက်ဆိုင်ရာပြည်သူ့လုံခြုံရေးဌာနဆီ အပ်နှံခဲ့တာဖြစ်ပါတယ်။
တရားခံကျော်ဝင်းချေဟာ ပုဏ္ဏားကျွန်းမြို့နယ်၊ ကြံခင်းစစ်ရှောင်စခန်းမှာစစ်ရှောင်နေချိန် အသက်သုံးဆယ်လေးနှစ်အရွယ်အမျိုးသမီးတဦးကို အဓမ္မပြုကျင့်မှုနဲ့ဖမ်းဆီးထိန်းသိမ်းခံထားရသူဖြစ်ပါတယ်။
ထွက်ပြေးလွတ်မြောက်နေဆဲဖြစ်တဲ့ အခြားမုဒိမ်းမှုတရားခံဘိုသန်းဝင်းကိုလည်း ပြန်လည်ဖမ်းဆီးရမိရေးအတွက် ဒီလပ်ဌာနကဆောင်ရွက်နေပါတယ်။
