Border News Agency
ဂမ်ဘီယာ၊ ဇန်နဝါရီ ၂၇ ။
မြန်မာစစ်တပ်ဟာ အာဆာ (ARSA) အဖွဲ့ကို ဖြိုခွဲဖို့ဘယ်တုန်းကမှ မကြိုးစားခဲ့သလို အာရက္ခတပ်တော် (AA)ကို တိုက်ခိုက်တဲ့နေရာမှာတောင် အာဆာနဲ့ပူးပေါင်းခဲ့တယ်လို့ ဂမ်ဘီယာရှေ့နေ အာဆလန်ဆူလေမန်က တရားရုံးမှာထည့်သွင်းပြောဆိုလိုက်ပါတယ်။
”အာဏာပိုင်တွေဟာ အာဆာအဖွဲ့ဝင်တွေ ဘယ်သူဘယ်ဝါဆိုတာကို သတင်းပေးတွေကတဆင့် အတိအကျသိနေတာတောင် ဖြိုခွဲဖို့ မကြိုးစားခဲ့တာဟာ နားမလည်နိုင်စရာပဲ။”လို့ ရှေ့နေ ဆူလေမန်က ပြောပါတယ်။
စစ်တပ်ဟာအာဆာကို အသုံးချပြီးဒေသခံကျေးရွာတွေကို တိုက်ခိုက်ဖို့နဲ့လူသူကင်းမဲ့အောင်လုပ်ဖို့အတွက် ဆင်ခြေတခုအနေနဲ့ တည်ရှိနေခွင့်ပေးထားတာလို့ သူကဆိုပါတယ်။
အဲဒီအပြင် အာရက္ခတပ်တော်ကို တိုက်ခိုက်ဖို့ စစ်ကော်မရှင်က အာဆာနဲ့ပူးပေါင်းခဲ့တဲ့ ငြင်းမရတဲ့သက်သေတွေကို တရားရုံးမှာ တင်ပြခဲ့ပေမယ့် မြန်မာနိုင်ငံဘက်က နှုတ်ဆိတ်နေခဲ့တာကိုလည်း ထောက်ပြခဲ့ပါတယ်။
အာရက္ခဒေသမှာ ပြီးခဲ့တဲ့ ၂၀၂၄ ခုနှစ်အတွင်း ရသေ့တောင်၊ ဘူးသီးတောင်နဲ့ မောင်တောဒေသတိုက်ပွဲတွေမှာ စစ်ကော်မရှင်တပ်ဟာ ARSA၊ RSO နဲ့ ARA စတဲ့ လက်နက်ကိုင်အဖွဲ့တွေကို အသုံးချပြီး AAကို ခုခံတိုက်ခိုက်ခဲ့တယ်လို့ဆိုပါတယ်။
အာရက္ခဒေသမှာ မွတ်ဆလင်တထောင့်ငါးရာခန့်ဟာ စစ်ကော်မရှင်တပ်ရဲ့အတင်အဓမ္မလူသစ်စုဆောင်းစစ်မှု ထမ်းခေါ်ဆောင်ခံခဲ့ကြရပြီး အများစုဟာစစ်တွေမြို့ နယ်မှ ဒုက္ခသည်မွတ်ဆလင်တွေဖြစ်တယ်လို့ မွတ်ဆလင်အသိုင်းအဝိုင်းက ဆိုကြပါတယ်။
