Border News Agency
အမေရိကန် ၊ဧပြီ ၁၅။

​အမေရိကန်နဲ့ အီရန်ကိုယ်စားလှယ်အဖွဲ့တွေဟာ အစ္စလာမ္မာဘတ်မြို့မှာ ဒီတပတ်အတွင်းဆွေးနွေးပွဲတွေ ပြန်စနိုင်တယ်လို့ Reuters က ဖော်ပြပါတယ်။

ပြီးခဲ့တဲ့ အပတ်ကဆွေးနွေးပွဲတွေပျက်ပြားခဲ့ပြီးနောက် အမေရိကန်ကအီရန်ဆိပ်ကမ်းတွေကို စတင်ပိတ်ဆို့ခဲ့တာပါ။

​အမေရိကန်ဒုသမ္မတ ဂျေဒီဗန့်စ်ကတော့ ဆွေးနွေးပွဲတွေမှာ တိုးတက်မှုရှိနေတယ်လို့ဆိုပေမယ့် အီရန်ဘက်ကဟော်မုဇ်ရေလက်ကြားကို ပြန်ဖွင့်ပေးဖို့မျှော်လင့်နေပါတယ်။

တကယ်လို့ အီရန်ဘက်က လိုက်လျောမှုမရှိရင်တော့ ဆွေးနွေးပွဲလမ်းကြောင်းပြောင်းသွားနိုင်တယ်လို့လည်း သူကသတိပေးထားပါတယ်။

​တဖက်မှာလည်း အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) က အီရန်စစ်ပွဲကြောင့် ကမ္ဘာ့စီးပွားရေးတိုးတက်မှု ခန့်မှန်းချက်ကို လျှော့ချလိုက်ပါတယ်။

စစ်ပွဲကပိုဆိုးလာပြီး ရေနံဈေးကတစည်ကို ဒေါ်လာ ၁၀၀ အထက်မှာဆက်ရှိနေရင် ကမ္ဘာ့စီးပွားရေးဟာ အကျပ်အတည်း နဲ့ ရင်ဆိုင်ရနိုင်တယ်လို့ သတိပေးထားပါတယ်။

​ဒီစစ်ပွဲကြောင့် လေယာဉ်ဆီဈေးနှုန်းတွေလည်းထိုးတက်နေပြီး ကမ္ဘာ့လေကြောင်းလိုင်းတွေမှာ အကျပ်အတည်းပိုဆိုးလာနေပါတယ်။

ဥရောပနဲ့ ဗြိတိန်တို့မှာလည်း ကုန်ဈေးနှုန်းကြီးမြင့်မှုတွေကြောင့် စီးပွားရေး တိုးတက်မှုနှုန်း နှေးကွေးသွားနိုင်တယ်လို့ IMF က ဆိုပါတယ်။

​ဟန်ဂေရီနိုင်ငံမှာတော့ ဝန်ကြီးချုပ်ဗစ်တာအော်ဘန်ရွေးကောက်ပွဲမှာ ရှုံးနိမ့်သွားခဲ့တာကြောင့် ဥရောပရဲ့လက်ယာစွန်းနိုင်ငံရေးမှာ အပြောင်းအလဲကြီးတခုဖြစ်သွားခဲ့ပါတယ်။

ဒါဟာ ဥရောပဈေးကွက်အတွက် အတားအဆီးတခုဖယ်ရှားလိုက်သလိုဖြစ်တယ်လို့ ရင်းနှီးမြှုပ်နှံသူတွေက သုံးသပ်နေကြပါတယ်။