Border News Agency
အီရန်၊ ဧပြီ ၁၈။
အစ္စရေးနဲ့လက်ဘနွန်ကြားအပစ်အခတ်ရပ်စဲရေး သဘောတူညီမှု ရရှိသွားပြီးနောက် ဟော်မုဇ်ရေလက်ကြားကို ကုန်သွယ်ရေးသင်္ဘောတွေအားလုံး ဖြတ်သန်းသွားလာနိုင်ဖို့ လုံးဝပွင့်လင်းသွားပြီလို့ အီရန်နိုင်ငံခြားရေးဝန်ကြီး အဘတ်စ် အာရတ်ချီက မနေ့ကကြေညာလိုက်ပါတယ်။
အီရန်နိုင်ငံခြားရေးဝန်ကြီးက သူ့ရဲ့ X လူမှုကွန်ရက်စာမျက်နှာမှာ လက်ဘနွန်အပစ်ရပ်မှုနဲ့အညီ အပစ်ရပ်ထားတဲ့ ကာလအတွင်းမှာ ဒီရေလက်ကြားကနေ ကုန်သွယ်ရေးသင်္ဘောတွေ ဖြတ်သန်းသွားလာမှုကို လုံးဝခွင့်ပြုလိုက်တာဖြစ်ကြောင်း အတည်ပြု ပြောကြားခဲ့တာပါ။
အခုလို သင်္ဘောတွေ ဖြတ်သန်းရာမှာတော့ အီရန်ဆိပ်ကမ်းနဲ့ ရေကြောင်းအဖွဲ့အစည်းက ကြေညာထားတဲ့ သတ်မှတ်လမ်းကြောင်းအတိုင်းပဲ ပူးပေါင်းဆောင်ရွက်ပြီး သွားလာကြရမှာ ဖြစ်ပါတယ်။
ဒါဟာ စစ်ပွဲကြောင့် ပိတ်ဆို့နေတဲ့ ကမ္ဘာ့ရေကြောင်းကုန်သွယ်ရေးအတွက် သတင်းကောင်းတခုလည်း ဖြစ်ပါတယ်။
အမေရိကန်သမ္မတ ဒေါ်နယ်ထရမ့်ကလည်း ဒီရေလက်ကြားဟာ စီးပွားရေးလုပ်ငန်းတွေနဲ့ ကုန်စည်စီးဆင်းမှုတွေအတွက် လုံးဝပွင့်လင်းသွားပြီလို့ လူမှုကွန်ရက်ကနေတဆင့် အတည်ပြု ပြောကြားခဲ့ပါတယ်။
အစ္စရေးနဲ့ လက်ဘနွန်ကြား ၁၀ ရက်ကြာ အပစ်ရပ်မှုဟာ ဧပြီလ ၁၇ ရက်နေ့ကစတင်အသက်ဝင်လာတာပါ။
ဒီရေလက်ကြား ပြန်ပွင့်သွားပြီဖြစ်လို့ စွမ်းအင်နဲ့ ကုန်စည်သယ်ယူပို့ဆောင်ရေးတွေ ပြန်လည်စတင်နိုင်တော့မှာ ဖြစ်ပါတယ်။
ဒါပေမယ့် အပစ်ရပ်စဲမှုဟာ အချိန်တိုအတွင်းမှာပဲ ဖြစ်နေသေးတာကြောင့် ဒေသတွင်း တင်းမာမှုတွေ လျော့ကျသွားမလားဆိုတာကိုတော့ ဆက်လက်စောင့်ကြည့်ရဦးမှာ ဖြစ်ပါတယ်။
