​Border News Agency
မိုးကုတ်၊ ဧပြီ ၂၄။

တအာင်းတပ်မတော်က စစ်ခေါင်းဆောင် မင်းအောင်လှိုင်ထံဂုဏ်ပြုသဝဏ်လွှာ ပေးပို့ခဲ့တဲ့အပေါ် CDM ကျန်းမာရေးကွန်ရက်က အလွန်အမင်းစိတ်ပျက်ရပြီးပြင်းထန်စွာကန့်ကွက်တယ်လို့ဧပြီလ ၂၄ ရက်၊ ဒီနေ့မှာ ထုတ်ပြန်ပါတယ်။

​စစ်ကော်မရှင်တပ်ဟာ နိုင်ငံတဝှမ်းရှိ ဆေးရုံ၊စာသင်ကျောင်းနဲ့ ဘာသာရေးအဆောက်အအုံတွေကို ဗုံးကြဲဖျက်ဆီးနေတာဖြစ်ပြီး တအာင်းတပ်ထိန်းချုပ်နယ်မြေတွေမှာလည်း ခုလိုဖျက်ဆီးမှုတွေ အမြောက်အမြား ရှိနေတယ်လို့ ထောက်ပြထားပါတယ်။

​တော်လှန်ရေးကိုမျက်ကွယ်ပြုပြီး စစ်ရာဇဝတ်ဂိုဏ်းကို အသိအမှတ်ပြု ဂုဏ်ပြုတာဟာ အသက်ပေးသွားကြတဲ့ အာဇာနည်တွေနဲ့ ပြည်သူတွေရဲ့မျက်နှာကို မထောက်တဲ့ လုပ်ရပ်ဖြစ်တယ်လို့ ဆိုပါတယ်။

အဲ​ဒါကြောင့် တအာင်းတပ်အနေနဲ့ စစ်ကော်မရှင်တပ်နဲ့ ပူးပေါင်းဆောင်ရွက်နေမှုတွေကို ချက်ချင်းရပ်တန့်ဖို့၊တော်လှန်ရေးအင်အားစုတွေ၊မဟာမိတ်တွေနဲ့အတူ စစ်အာဏာရှင် အမြစ်ပြတ်ရေးကိုသာ ဆက်လက်လုပ်ဆောင်ဖို့ တိုက်တွန်းထားပါတယ်။

​CDM ကျန်းမာရေးကွန်ရက်ဟာ ၂၀၂၁ ခုနှစ်ကတည်းက စစ်အာဏာရှင်စနစ်ကို ဆန့်ကျင်ပြီး ပြည်သူ့ကျန်းမာရေးအတွက် အားသွန်ခွန်စိုက် ပါဝင်ဆောင်ရွက်နေတဲ့ အဖွဲ့အစည်းဖြစ်ပါတယ်။