Border News Agency
ဘုတ်ပြင်း၊ ဧပြီ ၂၅။
တနင်္သာရီဒေသ၊ ဘုတ်ပြင်းမြို့နယ်မှာ စစ်ကော်မရှင်တပ်စခန်းကုန်းကို တော်လှန်ရေးတပ်ဖွဲ့တွေက ဧပြီလ ၁၈၊ ၂၀ နဲ့ ၂၁ရက်တွေမှာတိုက်ခိုက်ခဲ့လို့ စစ်ကော်မရှင်တပ်ဖွဲ့ဝင် ၅ ဦးသေဆုံး သွားတယ်လို့ SSTF Drone Forceက ထုတ်ပြန်ပါတယ်။
ဘုတ်ပြင်းမြို့နယ်၊ ဘိုဒါးကျေးရွာမှာ ၂ နှစ်ခန့် အထိုင်ချတပ်စွဲထားတဲ့ စစ်ကော်မရှင်တပ်စခန်းကို ဧပြီလ ၁၈ ရက်၊ မနက်ပိုင်းမှာ ဒရုန်းနဲ့တိုက်ခိုက်ခဲ့ပြီးနောက် ဝင်ရောက်ပစ်ခတ်တိုက်ခိုက်ခဲ့လို့ စစ်ကော်မရှင်တပ်ဖွဲ့ဝင် ၃ ဦးသေဆုံးပြီး ၄ ဦးဒဏ်ရာရခဲ့တယ်လို့ ဆိုပါတယ်။
အဲဒီဘိုဒါးကျေးရွာစခန်းကုန်းကို ဧပြီလ ၂၀ ရက်၊ မနက် ၁၀ နာရီခွဲခန့်မှာ ဒရုန်းနဲ့တိုက်ခိုက်ခဲ့သလို ဧပြီလ ၂၁ ရက်နေ့မှာလည်း ဗုံးနှစ်လုံးထပ်မံကြဲချတိုက်ခိုက်ခဲ့တယ်လို့ ဆိုပါတယ်။
အဲဒီလိုတိုက်ခိုက်ခဲ့တာကြောင့် စစ်ကော်မရှင်တပ်ဖွဲ့ဝင်နှစ်ဦးသေဆုံးပြီး နှစ်ဦးဒဏ်ရာရခဲ့သလို ဘန်ကာတွေနဲ့ ရိက္ခာသိုလှောင်နေရာတွေကို ဖျက်ဆီးနိုင်ခဲ့တယ်လို့ ဆိုပါတယ်။
အဲဒီတိုက်ခိုက်မှုကို KNU / KNLA အမှတ် ၂၀၃ တပ်ရင်းနဲ့ လုံခြုံရေးနဲ့ အကြမ်းဖက်နှိမ်နင်းရေးဌာနကြီး SSTF Drone Force က ပူးပေါင်းလုပ်ဆောင်ခဲ့တာဖြစ်တယ်လို့ ဆိုပါတယ်။
