Border News Agency
အမေရိကန်၊မေ ၁၃။
အမေရိကန်သမ္မတ ဒေါ်နယ်ထရမ့်က ကမ္ဘာ့ရေနံအများဆုံးထွက်တဲ့ ဗင်နီဇွဲလားနိုင်ငံကို အမေရိကန်ရဲ့ ၅၁ ခုမြောက် ပြည်နယ်အဖြစ် အပြီးအပိုင်သိမ်းသွင်းဖို့ အလေးအနက် စဉ်းစားနေတယ်လို့ Fox News နဲ့ အင်တာဗျူးမှာ ထုတ်ဖော်ပြောကြားလိုက်ပါတယ်။
ဗင်နီဇွဲလားမှာရှိတဲ့ ဒေါ်လာ ၄၀ ထရီလီယံတန်ဖိုးရှိတဲ့ ရေနံသယံဇာတတွေကို အသုံးချပြီး ရေနံလုပ်ငန်းတွေကို ပြန်လည်ပျိုးထောင်ဖို့ သူက ရည်ရွယ်နေတာပါ။
သမ္မတထရမ့်က ဗင်နီဇွဲလားပြည်သူတွေဟာ သူ့ကိုအရမ်းချစ်ကြတယ်လို့ ယုံကြည်နေသလို သူကိုယ်တိုင်လည်း ဗင်နီဇွဲလားမှာ လူကြိုက်များတယ်လို့ ဆိုပါတယ်။
ဒီခြေလှမ်းဟာ ပြီးခဲ့တဲ့ ဇန်နဝါရီလက ဗင်နီဇွဲလားခေါင်းဆောင်ဟောင်း နီကိုးလပ်စ်မာဒူရိုကို မူးယစ်ဆေးဝါး ကုန်သွယ်မှုနဲ့ အမေရိကန်တပ်ဖွဲ့တွေက ဖမ်းဆီးပြီးနောက်ပိုင်း ထွက်ပေါ်လာတဲ့ အပြောင်းအလဲတခုလည်း ဖြစ်ပါတယ်။
အမေရိကန်ဟာ ဗင်နီဇွဲလားရဲ့ အကူးအပြောင်းကာလ အုပ်ချုပ်ရေးမှာ ပါဝင်ကူညီနေပြီး ဒု-သမ္မတ ဒေစီရိုဒရီဂွက်ဇ်နဲ့ ပူးပေါင်းဆောင်ရွက်နေပါတယ်။
ဒါ့အပြင် အရင်ခေါင်းဆောင် ဟူဂိုချားဗက်ဇ်လက်ထက်မှာ နှင်ထုတ်ခံခဲ့ရတဲ့ Exxon နဲ့ Conoco လို ရေနံကုမ္ပဏီကြီးတွေကို ဗင်နီဇွဲလားမှာ ပြန်လည်ရင်းနှီးမြှုပ်နှံဖို့ ထရမ့်က စီစဉ်နေတာပါ။
ထရမ့်က သူ့ရဲ့ Truth Social လူမှုကွန်ရက်မှာလည်း “ဗင်နီဇွဲလားမှာ ကောင်းတာတွေ ဖြစ်တော့မယ်၊ ၅၁ ခုမြောက် ပြည်နယ်ဖြစ်လာဖို့ ဘယ်သူတွေ စိတ်ဝင်စားလဲ” ဆိုပြီး ရေးသားကာ လူထုရဲ့ စိတ်ဝင်စားမှုကို နှိုးဆွထားပါတယ်။
ဒါပေမယ့် တကယ်တမ်း ပြည်နယ်အဖြစ် သတ်မှတ်ဖို့ဆိုရင် အမေရိကန်လွှတ်တော်ရဲ့ သဘောတူညီချက်နဲ့ ဗင်နီဇွဲလားဘက်က သဘောတူညီမှုတွေ လိုအပ်တာကြောင့် ဒါဟာ လွယ်ကူတဲ့ကိစ္စတော့ မဟုတ်ပါဘူး။
နိုင်ငံရေးလေ့လာသူတွေကတော့ ထရမ့်ရဲ့ ဒီအစီအစဉ်ဟာ ကမ္ဘာ့အကြီးဆုံး စွမ်းအင်အရင်းအမြစ်တွေကို ထိန်းချုပ်နိုင်ဖို့အတွက် ဖိအားပေးတဲ့ နည်းဗျူဟာတစ်ခု ဖြစ်နိုင်တယ်လို့ သုံးသပ်နေကြပါတယ်။
ဗင်နီဇွဲလားကို ပြည်နယ်အဖြစ် သိမ်းသွင်းမလား၊ ဒါမှမဟုတ် ရေနံကိုပဲ အဓိကထား ထိန်းချုပ်မလားဆိုတာကတော့ ဆက်လက်စောင့်ကြည့်ရမယ့် အခြေအနေမှာ ရှိနေပါတယ်။
