Border News Agency
ဆွစ်ဇာလန်၊ဇွန် ၂၃။
ဆွစ်ဇာလန်နိုင်ငံမှာပြုလုပ်ခဲ့တဲ့ အမေရိကန်နဲ့ အီရန်တို့ရဲ့ အဆင့်မြင့်ဆွေးနွေးပွဲတွေဇွန်လ ၂၂ ရက်နေ့မှာ အောင်မြင်စွာ ပြီးဆုံးသွားခဲ့ပြီး နှစ်နိုင်ငံကြား ဖြစ်ပွားနေတဲ့ စစ်ပွဲကို အဆုံးသတ်နိုင်ဖို့အတွက် ငြိမ်းချမ်းရေး လမ်းပြမြေပုံတခုကို နှစ်ဖက်သဘောတူညီခဲ့ကြပါတယ်။
အမေရိကန် ဒုသမ္မတ JD Vance နဲ့ အီရန်လွှတ်တော်ဥက္ကဋ္ဌတို့ ဦးဆောင်တဲ့ ဒီဆွေးနွေးပွဲမှာ ဟော်မုဇ်ရေလက်ကြားကို ပိတ်ဆို့မှုမရှိဘဲ လွတ်လပ်စွာသွားလာနိုင်ဖို့နဲ့ လက်ဘနွန်နိုင်ငံအတွင်း ဖြစ်ပွားနေတဲ့ တိုက်ပွဲတွေကို ရပ်တန့်ဖို့ အဓိကထား ဆွေးနွေးခဲ့ကြတာပါ။
ပါကစ္စတန်နဲ့ ကာတာနိုင်ငံတို့ရဲ့ ကြားဝင်ညှိနှိုင်းမှုနဲ့အတူ လာမယ့်ရက် ၆၀ အတွင်း အပြီးသတ် ငြိမ်းချမ်းရေးစာချုပ်ချုပ်ဆိုနိုင်ဖို့အတွက် လမ်းပြမြေပုံကို ရေးဆွဲခဲ့တာဖြစ်ပါတယ်။
အဲဒီ ဆွေးနွေးပွဲကာလအတွင်း အမေရိကန်သမ္မတ ဒေါ်နယ်ထရမ့်ရဲ့ ခြိမ်းခြောက်ပြောဆိုမှုတွေကြောင့် အီရန်ဘက်ကခေတ္တထွက်ခွာတာမျိုး ရှိခဲ့ပေမယ့် နောက်ဆုံးမှာတော့ အပြုသဘောဆောင်တဲ့ တိုးတက်မှုတွေ ရရှိခဲ့တယ်လို့ ကြားဝင်ညှိနှိုင်းသူတွေက ပြောပါတယ်။
အီရန်ဘက်ကလည်း ရေနံတင်ပို့မှုအပေါ် ပိတ်ဆို့ထားတာတွေကို ရုပ်သိမ်းပေးဖို့၊အေးခဲထားတဲ့ ပိုင်ဆိုင်မှုတွေကို ပြန်ထုတ်ပေးဖို့နဲ့ စီးပွားရေး ပြန်လည်ထူထောင်ဖို့အတွက် အမေရိကန်နဲ့ သဘောတူညီချက် ရရှိခဲ့ပါတယ်။
အီရန်နိုင်ငံခြားရေးဝန်ကြီးကတော့ ဒီဆွေးနွေးမှုတွေဟာ လက်ဘနွန်စစ်ပွဲကို အဆုံးသတ်ဖို့အတွက် တကယ့်ကို ကြီးမားတဲ့ တိုးတက်မှုတခုပါပဲလို့ သူ့ရဲ့ လူမှုကွန်ရက်မှာ ရေးသားထားပါတယ်။
တိုက်ပွဲတွေ ထပ်မဖြစ်အောင်လို့ နှစ်ဖက် တင်းမာမှုလျော့ချရေးအဖွဲ့ (Deconfliction cell) တခုကိုလည်း ဖွဲ့စည်းထားလိုက်ပါပြီ။
ဒါပေမယ့် အစ္စရေးဝန်ကြီးချုပ်ကတော့ သူတို့တပ်တွေ တောင်ပိုင်းလက်ဘနွန်မှာ လိုအပ်သရွေ့ ဆက်ရှိနေဦးမှာဖြစ်ပြီး အီရန်ကို နျူကလီးယားလက်နက် ပိုင်ဆိုင်ခွင့်ပေးမှာ မဟုတ်ဘူးလို့ ပြန်ပြောထားပါတယ်။
အခုလို ငြိမ်းချမ်းရေးဆွေးနွေးနေချိန်မှာပဲ အီရန်ဘက်ကတော့ သူတို့ရဲ့ ယူရေနီယမ် သန့်စင်မှုက အခွင့်အရေးတခုသာ ဖြစ်ပြီး နျူကလီးယားဗုံး ထုတ်လုပ်ဖို့ ရည်ရွယ်ချက် မရှိကြောင်းကိုလည်း ထပ်လောင်း ပြောကြားသွားပါတယ်။
