Border News Agency
အမေရိကန်၊ဇွန် ၂၃။
အမေရိကန်စစ်တပ်ဟာ အရှေ့ပစိဖိတ်သမုဒ္ဒရာအတွင်း မူးယစ်ဆေးဝါးမှောင်ခိုသယ်ဆောင်လာတယ်လို့ စွပ်စွဲခံထားရတဲ့ စက်လှေတစီးကို တိုက်ခိုက်ခဲ့တဲ့အတွက် လူ ၂ ဦး သေဆုံးခဲ့တယ်လို့ သိရပါတယ်။
ပြီးခဲ့တဲ့ စက်တင်ဘာလကတည်းက စတင်ခဲ့တဲ့ “Southern Spear”စစ်ဆင်ရေးအတွင်း အမေရိကန်စစ်တပ်က အခုလိုတိုက်ခိုက်မှုတွေကြောင့် စက်လှေပေါင်း ၆၀ ကျော် ပျက်စီးခဲ့ပြီး လူပေါင်း ၂၁၀ ကျော် သေဆုံးခဲ့ပြီး ဖြစ်ပါတယ်။
အမေရိကန်တောင်ပိုင်းစစ်ဌာနချုပ်က အဲဒီပါစက်လှေဟာ မူးယစ်ဆေးဝါး သယ်ဆောင်လေ့ရှိတဲ့ လမ်းကြောင်းမှာမောင်းနှင်နေတာဖြစ်ကြောင်းပြောဆိုပေမယ့် စက်လှေပေါ်မှာ မူးယစ်ဆေးဝါးပါတဲ့ အထောက်အထား တစုံတရာ ပြသနိုင်တာ မရှိခဲ့ပါဘူး။
တိုက်ခိုက်မှုဖြစ်ပွားပြီးနောက် အသက်ရှင်ကျန်ရစ်သူ အမျိုးသား ၆ ဦးရှိနေကာသူတို့ကို ကယ်ဆယ်ရေးအတွက် အမေရိကန်ကမ်းခြေစောင့်တပ်ဖွဲ့ကို အကြောင်းကြားထားတယ်လို့ ထုတ်ပြန်ထားပါတယ်။
ဒါပေမယ့် ကယ်ဆယ်ရေးအသေးစိတ် အခြေအနေတွေကိုတော့ ထုတ်ပြန်တာ မရှိခဲ့ပါဘူး။
သမ္မတ ဒေါ်နယ်ထရမ့်ကတော့ လက်တင်အမေရိက မူးယစ်ဂိုဏ်းတွေကို အရေးယူဖို့အတွက် ဒီစစ်ဆင်ရေးဟာ မဖြစ်မနေ လိုအပ်တယ်လို့ ပြောဆိုထားပေမယ့် ဝေဖန်သူတွေကတော့ အမေရိကန်နိုင်ငံထဲကို ရောက်ရှိနေတဲ့ ဖန်တနိုင်းအများစုဟာ မက္ကဆီကိုနိုင်ငံကနေ ကုန်းလမ်းကတဆင့် မှောင်ခိုသွင်းလာတာဖြစ်တယ်လို့ ထောက်ပြထားပါတယ်။
