Border News Agency
အမေရိကန်၊ သြဂုတ် ၂။
အမေရိကန်နဲ့အစ္စရေးတို့က အီရန်ရဲ့စွမ်းအင်နဲ့ အရပ်ဘက်အခြေခံအဆောက်အအုံတွေကို တိုက်ခိုက်ဖို့ပြင်ဆင်နေတဲ့ သတင်းတွေထွက်ပေါ်လာပြီးနောက် ပြင်းထန်စွာလက်တုံ့ပြန်သွားမယ်လို့ အီရန်စစ်ဘက်ဆိုင်ရာတာဝန်ရှိသူတွေက ဩဂုတ်လ ၁ ရက်နေ့မှာ သတိပေးလိုက်ပါတယ်။
အမေရိကန်ဟာ ဒေသတွင်းစစ်ပွဲကြီးဖြစ်ပွားအောင်လုပ်ဆောင်နေပြီး အမေရိကန်ကိုကာကွယ်ပေးတဲ့ မူဆလင်နိုင်ငံတွေအနေနဲ့လည်းစစ်မီးကူးစက်ခံရမှာလို့ အီရန်စစ်ဘက်ဆိုင်ရာ ထိပ်တန်းအရာရှိကြီး Major General Ali Abdollahi က ပြောကြားခဲ့တာပါ။
အမေရိကန်နဲ့အစ္စရေးဟာ အီရန်ရဲ့လျှပ်စစ်ဓာတ်အားပေးစက်ရုံတွေနဲ့ ရေနံဓာတုဗေဒစက်ရုံတွေကို သီတင်းပတ်နှစ်ပတ်ကြာတိုက်ခိုက်ဖို့စီစဉ်နေတယ်လို့ အမေရိကန် မီဒီယာအချို့မှာဖော်ပြထားပါတယ်။
အီရန်စစ်တပ်ဘက်ကလည်း အမေရိကန်နဲ့အစ္စရေးတို့တိုက်ခိုက်လာရင် အဓိကကျတဲ့အခြေခံအဆောက်အအုံတွေကို ပြန်လည်တိုက်ခိုက်ဖို့ တန်ပြန်စစ်ဆင်ရေးမဟာဗျူဟာတွေရေးဆွဲထားပြီးလို့ ခြိမ်းခြောက်ထားတာပါ။
အဲဒီစစ်ရေးတင်းမာမှုတွေကြောင့် အရှေ့အလယ်ပိုင်းဒေသအတွင်း ဒေသတွင်းစစ်ပွဲပိုမိုကျယ်ပြန့်လာမှာကို အိမ်နီးချင်းနိုင်ငံတွေနဲ့နိုင်ငံတကာက စိုးရိမ်နေကြပါတယ်။
