Border News Agency
နေပြည်တော်၊ သြဂုတ် ၅။
ဒီမိုကရေစီပြန်လည်ထူထောင်ရေးနဲ့ နိုင်ငံရေးအကျဉ်းသားတွေ အားလုံးလွတ်မြောက်ရေးအတွက် ပြည်သူနဲ့အတူ ဆက်လက်ကြိုးပမ်းသွားမယ်လို့ အမျိုးသားဒီမိုကရေစီအဖွဲ့ချုပ်(NLD)ကဩဂုတ်လ ၅ ရက်၊ ဒီနေ့ထုတ်ပြန်ပါတယ်။
နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့ အပြည်ပြည်ဆိုင်ရာကြက်ခြေနီကော်မတီ (ICRC) ကိုယ်စားလှယ်တွေ့ခဲ့တာကို အလေးထားစောင့်ကြည့်နေတယ်လို့လည်းဆိုပါတယ်။
ဒေါ်အောင်ဆန်းစုကြည်အပါအဝင် မတရားဖမ်းဆီးခံထားရတဲ့ နိုင်ငံရေးအကျဉ်းသားတွေရဲ့ အသက်အန္တရာယ်ကင်းရှင်းရေး၊ ကျန်းမာရေးနဲ့အစားအသောက် လုံလောက်စွာရရှိရေးအပြင် မိသားစုနဲ့ရှေ့နေတွေနဲ့ပါ လွတ်လပ်စွာတွေ့ဆုံခွင့်ရဖို့ အာမခံပေးရမယ်လို့ NLD က တိုက်တွန်းထားပါတယ်။
အဲဒီအပြင် ICRC နဲ့တွေ့ဆုံမှုတခုတည်းနဲ့ နိုင်ငံရေးအကျပ်အတည်းကို အပြုသဘောဆောင်အလှည့်အပြောင်းဖြစ်လာပြီလို့ ကောက်ချက်မချကြဖို့နဲ့ ICRC ရဲ့ ဆောင်ရွက်ခွင့်တွေကို ဆက်စောင့်ကြည့်ရမယ်လို့ သတိပေးထားပါတယ်။
မြန်မာ့နိုင်ငံရေးအကျပ်အတည်းကိုဖြေရှင်းဖို့ဆိုရင် ပြည်သူလူထုရဲ့ဒီမိုကရေစီဆန္ဒကို လေးစားရမှာဖြစ်သလို အကြမ်းဖက်မှုတွေချက်ချင်းရပ်တန့်ပြီး နိုင်ငံရေးအကျဉ်းသားအားလုံးကို ခြွင်းချက်မရှိအမြန်ဆုံးလွှတ်ပေးရမှာ ဖြစ်တယ်လို့ဆိုပါတယ်။
လာမယ့်အာဆီယံအထူးကိုယ်စားလှယ်ရဲ့ခရီးစဉ်အတွင်း ဒေါ်အောင်ဆန်းစုကြည်အပါအဝင် သက်ဆိုင်သူတွေနဲ့လွတ်လပ်စွာတွေ့ဆုံခွင့်ရရှိပြီး အားလုံးပါဝင်တဲ့ နိုင်ငံရေးဆွေးနွေးမှုတွေ ပေါ်ပေါက်လာမှသာ လက်တွေ့ကျတဲ့တိုးတက်မှုအဖြစ် သတ်မှတ်နိုင်မယ်လို့ ဆိုပါတယ်။
