Border News Agency
မန္တလေး၊ သြဂုတ် ၁၁။
မန္တလေးတိုင်းဒေသကြီး၊ ချမ်းမြသာစည်မြို့နယ်မှာ ငွေကျပ် ၁ ဒသမ ၄၈၅ ဘီလီယံတန်ဖိုးရှိ ဘိန်းဖြူ ၅၉ ဒသမ ၄ ကီလိုကို HIJET မော်တော်ယာဉ်တစီးနဲ့အတူ အမျိုးသမီးနှစ်ဦးကို ဖမ်းဆီးရမိခဲ့တယ်လို့ မူးယစ်ဆေးဝါးတားဆီးကာကွယ်ရေးဗဟိုအဖွဲ့က သြဂုတ်လ ၁၀ ရက်၊မနေ့ကထုတ်ပြန်ပါတယ်။
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ပါဝင်တဲ့ ပူးပေါင်းအဖွဲ့ဟာ ဩဂုတ်လ ၃ ရက်၊ ည ၈ နာရီခွဲအချိန်မှာ ချမ်းမြသာစည်မြို့နယ်၊ ထွန်တုံးရပ်ကွက်အတွင်းစစ်ဆေးခဲ့ရာကနေ မကြည်ကြည်အေးနဲ့ မနန်းမြရင်တို့နှစ်ဦးဆီက ပလတ်စတဆပ်ပြာခွက် ၆,၆၀၀ နဲ့ ထည့်ထားတဲ့ ဘိန်းဖြူတွေကိုဖမ်းဆီးမိခဲ့တာပါ။
အဲဒီဘိန်းဖြူတွေကို ချမ်းမြသာစည်မြို့နယ်အတွင်းလွှဲပြောင်းပေးခဲ့သူ ကျောက်မဲမြို့နေ စိုင်းနော်ခမ်းနဲ့လားရှိုးမှ မန္တလေးသို့ ပို့ဆောင်ရောင်းချပေးသူ လားရှိုးမြို့နယ်မှ အန်ဇန်တို့ဖြစ်တယ်လို့ဆိုပါတယ်။
အဲဒီဖမ်းဆီးရမိသူတွေကို မူးယစ်ဆေးဝါးနဲ့ စိတ်ကိုပြောင်းလဲစေသောဆေးဝါးဆိုင်ရာဥပဒေနဲ့ အရေးယူထားပြီး ထွက်ပြေးလွတ်မြောက်နေသူတွေကိုလည်း ဆက်လက်စစ်ဆေးဖော်ထုတ်နေပါတယ်။
အဲဒီအပြင် မူးယစ်ဆေးဝါးရောင်းဝယ်ရာကနေရရှိထားတဲ့ ငွေကြေးအကျိုးအမြတ်နဲ့ ပိုင်ဆိုင်မှုတွေကို ပြည်သူ့ဘဏ္ဍာအဖြစ် သိမ်းဆည်းနိုင်ဖို့ ငွေကြေးခဝါချမှုတိုက်ဖျက်ရေးဥပဒေနဲ့ပါ ဆက်လက်အရေးယူဆောင်ရွက်နေတယ်လို့ ဆိုပါတယ်။
