Border News Agency
မောင်တော၊ အောက်တိုဘာ ၃၁။
မြန်မာနိုင်ငံကနေထွက်ပြေးလာပြီး ဘင်္ဂလားဒေ့ရှ်နိုင်ငံမှာ ခိုလှုံနေတဲ့ ရိုဟင်ဂျာ ဒုက္ခသည်ဦးရေဟာ အခုဆိုရင် ၁.၂ သန်းကျော် ရှိလာပြီလို့ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှုယန္တရား (IIMM) အကြီးအကဲ နီကိုလက်စ်ခွန်ဂျန်က (၈၁) ကြိမ်မြောက် ကုလသမဂ္ဂအထွေထွေညီလာခံမှာ ပြောကြားခဲ့ပါတယ်။
ဒီအထဲက ရိုဟင်ဂျာ ၁၅၅,၀၀၀ ကျော်ဟာ ၂၀၂၄ ခုနှစ် အစောပိုင်းကမှ ထပ်မံထွက်ပြေးရောက်ရှိလာသူတွေ ဖြစ်ကြပြီး ဘင်္ဂလားဒေ့ရှ်ခိုလှုံရေးစခန်းတွေဆီသွားရောက်ကာ စုံစမ်းစစ်ဆေးမှုတွေပြုလုပ်ခဲ့တယ်လို့လည်း ဆိုပါတယ်။
တွေ့ဆုံခဲ့ရတဲ့ ရိုဟင်ဂျာတွေထဲမှာ ရခိုင်ပြည်အတွင်း သားသမီး ၅ ဦးစလုံး အသတ်ခံခဲ့ရသူ အမျိုးသားတဦးနဲ့ ခင်ပွန်းဖြစ်သူ အာရက္ခတပ်တော်ရဲ့ ဖမ်းဆီးခေါ်ဆောင်တာ ခံထားရသူ အမျိုးသမီးတဦးတို့ ပါဝင်ပြီး အားလုံးဟာ ထိတ်လန့်ဖွယ် စိတ်ဒဏ်ရာတွေခံစားနေကြရတယ်လို့ဆိုပါတယ်။
ဒုက္ခသည်တွေအားလုံးဟာ မြန်မာနိုင်ငံဆီ ပြန်သွားချင်ကြပြီး တရားမျှတမှုရရှိရေးကြိုးပမ်းမှုတွေကြောင့် ဘေးကင်းလုံခြုံစွာ နေရပ်ပြန်နိုင်မယ့်နေ့ ပိုမြန်လာဖို့မျှော်လင့်နေကြတယ်လို့ IIMM က ဆိုပါတယ်။
ဒါကြောင့် အနာဂတ်တရားစွဲဆိုမှုတွေအတွက် အထောက်အထားတွေကို တစိုက်မက်မက်စုဆောင်းနေပြီး ရာဇဝတ်မှုကျူးလွန်သူတွေကို တရားဥပဒေအရ အရေးယူနိုင်ရေး နိုင်ငံတကာတရားရေးအာဏာပိုင်တွေနဲ့ ဆက်လက်ပူးပေါင်း ဆောင်ရွက်သွားမယ်လို့လည်းဆိုပါတယ်။
