Border News Agency
မြိတ်၊ ဧပြီ ၂၇။
ကရင်အမျိုးသားအစည်းအရုံး၊ မြိတ်-ထားဝယ်ခရိုင်၊ ကစယ်ဒိုမြို့နယ်ရှိပေါခလိုးမြစ်ဝှမ်းဒေသကို ဌာနေလူမျိုးစု ထိန်းသိမ်းနယ်မြေအဖြစ် တရားဝင်ကြေညာလိုက်ပါတယ်။
အဲဒီအခမ်းအနားကို ဧပြီလ ၂၂ ရက်ကနေ ၂၄ ရက်နေ့အထိကျင်းပပြုလုပ်ခဲ့တာဖြစ်ပြီး ကေအဲန်ယူ (ဗဟို) သစ်တောဌာနမှူး ပဒိုမန်းဘထွန်း၊မြိတ်-ထားဝယ်ခရိုင် ဥက္ကဌ ပဒိုစောဖလို့စိုးဝင်းနဲ့ တာဝန်ရှိသူတွေအပြင် ဌာနေလူမျိုးစုခေါင်းဆောင်တွေနဲ့ ဒေသခံ စုစုပေါင်း ၁,၀၀၀ ကျော်တက်ရောက်ခဲ့ကြပါတယ်။
အဲဒီလိုထိန်းသိမ်းနယ်မြေ သတ်မှတ်ရတာဟာ ဌာနေလူမျိုးစုတွေအနေနဲ့ မိမိတို့ရဲ့ တောတောင်နယ်မြေနဲ့ သယံဇာတတွေကို ကိုယ်တိုင်စီမံခန့်ခွဲခွင့်နဲ့ ကိုယ်ပိုင်ပြဋ္ဌာန်းခွင့်ကို ရရှိကျင့်သုံးနိုင်ဖို့အတွက် ဖြစ်တယ်လို့ ဆိုပါတယ်။
ဒါ့အပြင် ဘိုးဘွားအစဉ်အဆက် ထိန်းသိမ်းလာခဲ့တဲ့ သဘာဝအရင်းအမြစ်တွေနဲ့ ရိုးရာယဉ်ကျေးမှုတွေကို ခုမျိုးဆက်သာမက နောင်မျိုးဆက်သစ်တွေအထိ လက်ဆင့်ကမ်း ထိန်းသိမ်းစောင့်ရှောက်သွားနိုင်ဖို့ ရည်ရွယ်တာပါ။
အဲဒီကေအဲန်ယူနယ်မြေအတွင်း ဒေသခံတွေရဲ့ သဘာဝပတ်ဝန်းကျင်နဲ့ နယ်မြေဒေသ ထိန်းသိမ်းစောင့်ရှောက်ရေး လုပ်ငန်းစဉ်တွေကို အခုလို တရားဝင်နယ်မြေ သတ်မှတ်ခြင်းကတစ်ဆင့် ပိုမိုမြှင့်တင်ဆောင်ရွက်သွားမယ်လို့ဆိုပါတယ်။
