Border News Agency
စီဘူး၊ မေ ၁၀။
ဖိလစ်ပိုင်နိုင်ငံ၊စီဘူးမြို့မှာ ကျင်းပနေတဲ့ ၄၈ ကြိမ်မြောက် အာဆီယံထိပ်သီးအစည်းအဝေးမှာ မြန်မာ့အရေးလှုပ်ရှားသူတွေနဲ့ လူမှုအဖွဲ့အစည်းတွေ ပူးပေါင်းပြီး အာဏာသိမ်းစစ်တပ်ရဲ့ အကြမ်းဖက်မှုတွေကို ကန့်ကွက်ဆန္ဒပြခဲ့ကြပါတယ်။
အဲဒီဆန္ဒပြသူတွေဟာ မြန်မာ့အရေးနဲ့ ပတ်သက်ပြီး အာဆီယံကို တောင်းဆိုချက်တွေ ပါဝင်တဲ့ စီဘူးကြေညာစာတမ်းကိုလည်း ထုတ်ပြန်ခဲ့ပါတယ်။
အဲဒီကြေညာချက်မှာ အာဏာသိမ်းစစ်တပ်ရဲ့ ၂၀၂၅-၂၀၂၆ ရွေးကောက်ပွဲဟာ လူထုကို သတ်ဖြတ်နှိပ်ကွပ်ပြီး ရယူထားတဲ့ အတုအယောင်သာဖြစ်လို့ အပြင်းအထန်ရှုတ်ချခဲ့ကြပါတယ်။
အာဆီယံအနေနဲ့လည်း ဒီရွေးကောက်ပွဲရလဒ်ကနေ ထွက်ပေါ်လာတဲ့ ကိုယ်စားလှယ်တွေကို အသိအမှတ်မပြုဘဲ ပယ်ချဖို့ တောင်းဆိုထားပါတယ်။
ဒါ့အပြင် စစ်တပ်ရဲ့ ခြိမ်းခြောက်မှုကြားက ရွေးကောက်ပွဲကို သပိတ်မှောက်ခဲ့ကြတဲ့ မဲဆန္ဒရှင် ၁၁ သန်းအပါအဝင် အဖိနှိပ်ခံပြည်သူတွေနဲ့အတူ အပြည့်အဝရပ်တည်တယ်လို့လည်းဆိုထားပါတယ်။
စစ်တပ်ဟာ ရွေးကောက်ပွဲကာလအတွင်းမှာတောင်လေကြောင်းတိုက်ခိုက်မှုပေါင်း ၃၀၀ ကျော် ပြုလုပ်ခဲ့ပြီး လူထုကို ဆက်တိုက်သတ်ဖြတ်နေတယ်လို့ ထောက်ပြထားပါတယ်။
အာဆီယံနဲ့လက်ရှိဥက္ကဋ္ဌ ဖိလစ်ပိုင်နိုင်ငံအနေနဲ့ အာဏာသိမ်းစစ်တပ်ရဲ့ လှည့်ဖြားမှုတွေအောက်မှာ အယုံမလွယ်ဘဲ မြန်မာပြည်သူတွေဘက်က ပြတ်သားစွာ ရပ်တည်ပေးဖို့ လိုအပ်တယ်လို့လည်းဆိုပါတယ်။
စစ်တပ်ဆီကိုလက်နက်၊လေယာဉ်ဆီနဲ့ ငွေကြေးတွေ စီးဆင်းမသွားအောင် အာဆီယံက ထိထိရောက်ရောက် တားဆီးပေးဖို့လည်းတိုက်တွန်းထားပါတယ်။
အဲဒီအပြင်လူသားချင်းစာနာမှုဆိုင်ရာ အကူအညီတွေကိုလည်း အာဏာသိမ်းစစ်တပ်ကတဆင့် မဟုတ်ဘဲ နယ်စပ်ဖြတ်ကျော်နည်းလမ်းတွေနဲ့ ဒုက္ခသည်တွေဆီ တိုက်ရိုက်ရောက်အောင် လုပ်ဆောင်ပေးဖို့ အရေးကြီးတယ်လို့လည်းဆိုပါတယ်။
အာဆီယံဟာ လူသတ်စစ်တပ်ရဲ့ ကိုယ်စားလှယ်တွေကို အစည်းအဝေးတွေကနေ လုံးဝဖယ်ထုတ်ပစ်ရမှာလည်း ဖြစ်ပါတယ်။
အာဆီယံအနေနဲ့ မြန်မာပြည်သူတွေကို အမှန်တကယ်ကိုယ်စားပြုတဲ့ အမျိုးသားညီညွတ်ရေးအစိုးရ (NUG) နဲ့သာ တရားဝင်ဆက်ဆံရမှာဖြစ်တယ်လို့လည်းဆိုပါတယ်။
ဖက်ဒရယ်ဒီမိုကရေစီဆီ လျှောက်လှမ်းနေတဲ့ ပြည်သူတွေရဲ့ တိုက်ပွဲကို ဝန်းရံပေးဖို့ စီဘူးကြေညာစာတမ်းမှာ အလေးအနက် တောင်းဆိုထားပါတယ်။
