Border News Agency
ဆီလန်ဂေါ၊ အောက်တိုဘာ ၁၆။
မလေးရှားနိုင်ငံ၊ဆီလန်ဂေါပြည်နယ် ရေပြင်အတွင်းလိုင်စင်စည်းကမ်းချက်တွေချိုးဖောက်ပြီး ငါးဖမ်းနေတဲ့ ဒေသခံ Class C ငါးဖမ်းလှေ နှစ်စီးနဲ့အတူ တရားဝင် စာရွက်စာတမ်းမပြနိုင်တဲ့ မြန်မာနိုင်ငံသားခြောက်ဦး ဖမ်းဆီးထိန်းသိမ်းခံလိုက်ရပါတယ်။
မလက္ကာ ရေလက်ကြား၊ ဆွန်ဂိုင်း ဘေဆာ၊ တန်ဂျုန်း ဆော အနောက်တောင်ဘက် ရေမိုင် ကိုးမိုင်နီးပါး အကွာအဝေးမှာ အောက်တိုဘာလ ၁၄ ရက်နေ့က မလေးရှား ရေကြောင်းစောင့်ရှောက်ရေး အေဂျင်စီကင်းလှည့်သင်္ဘောကငါးဖမ်းလှေနှစ်စီးကို ဖမ်းဆီးခဲ့တာဖြစ်ပါတယ်။
ပထမလှေပေါ်မှာ မလေးရှားနိုင်ငံသား လှေဦးစီးတဦးနဲ့အတူ မြန်မာသင်္ဘောသား သုံးဦးပါဝင်ပြီး ဒုတိယလှေပေါ်မှာတော့ လှေဦးစီးအပါအဝင် မြန်မာသင်္ဘောသားသုံးဦး မောင်းနှင်နေတာဖြစ်ပါတယ်။
အဲဒီမြန်မာခြောက်ဦးလုံးမှာ တရားဝင်စာရွက်စာတမ်းနဲ့ အလုပ်လုပ်ခွင့် ပါမစ်မရှိကြပါဘူး။
အဲဒီအပြင်လှေ နှစ်စီးဟာ ကမ်းခြေမှ ၁၅ ရေမိုင်ထက်နည်းတဲ့ အကွာအဝေးမှာ ငါးဖမ်းခဲ့တာကြောင့် သတ်မှတ်ထားတဲ့ လိုင်စင် စည်းကမ်းချက်တွေကို ချိုးဖောက်ခဲ့တာဖြစ်ပြီး လှေပေါ်က ရောနှောငါး အလေးချိန် ၃၅၀ ကီလိုဂရမ်ကိုလည်း သိမ်းဆည်းရမိခဲ့ပါတယ်။
အဲဒီဖမ်းဆီးရမိသူတွေနဲ့ လှေတွေကို ပူလောက် အင်းဒါးရှိ ရေကြောင်းရဲတပ်ဖွဲ့ ဆိပ်ခံတံတားဆီ ပို့ဆောင်ထားပြီး ၁၉၈၅ ခုနှစ် ငါးလုပ်ငန်း အက်ဥပဒေအပါအဝင် လူဝင်မှုကြီးကြပ်ရေး ဥပဒေတွေနဲ့ ဆက်လက် စုံစမ်းစစ်ဆေး အရေးယူဆောင်ရွက်နေပါတယ်။
