Border News Agency
ထိုင်း၊ နိုဝင်ဘာ ၂၁။
ထိုင်းနိုင်ငံ၊ Buriram ပြည်နယ်၊ Nang Rong ခရိုင်မှာ အလုပ်လာရှာတဲ့ အသက်ဆယ့်ရဗစ်နှစ်အရွယ် မြန်မာအမျိုးသမီးငယ်တဦး အသတ်ခံရပြီး အလောင်းကို လမ်းဘေးမြက်တောထဲစွန့်ပစ်ခဲ့တဲ့ အမှုမှာ ကျူးလွန်သူ အသက်လေးဆယ်ခုနှစ်နှစ်အရွယ် ထိုင်းအမျိုးသားကို ရဲတပ်ဖွဲ့ကဖမ်းဆီးလိုက်ပါတယ်။
နိုဝင်ဘာလ၂၀ ရက်၊ မနေ့က မနက် ၁ နာရီဝန်းကျင်မှာ Highway 24 လမ်းဘေး Nong Thua Paepရွာအဝင်အနီး မြက်တောထဲမှာ ဦးခေါင်းနဲ့ ခြေထောက်တွေကို ပလတ်စတစ်အိတ်တွေနဲ့ ဖုံးအုပ်ထားတဲ့ အမျိုးသမီးငယ်ရဲ့ ရုပ်အလောင်းကို ဒေသခံတွေကတွေ့ရှိခဲ့တာ ဖြစ်ပါတယ်။
အဲဒီသေဆုံးသူဟာ Chiang Rai ပြည်နယ်ကနေတဆင့် ခရီးသွားဗီဇာနဲ့ ဝင်ရောက်လာပြီး Buriram မှာ အိမ်အကူအလုပ် လုပ်ကိုင်ဖို့ ခေါ်ဆောင်ခံခဲ့ရသူဖြစ်ကာ သေဆုံးသူ နောက်ဆုံးပေးပို့ခဲ့တဲ့ တည်နေရာ သဲလွန်စကနေတဆင့် ကျူးလွန်သူကို ခြေရာခံနိုင်ခဲ့တာဖြစ်ပါတယ်။
ဖမ်းဆီးရမိသူ Thinnaphat ဆိုသူ ထိုင်းအမျိုးသားက အမျိုးသမီးငယ်ကို လိင်ပိုင်းဆိုင်ရာ ကျူးလွန်ဖို့ ကြိုးစားရာမှ ပြန်လည်ခုခံတဲ့အတွက် ကိုယ်ထိလက်ရောက် တိုက်ခိုက်သတ်ဖြတ်ခဲ့ပြီး အလောင်းကို အနက်ရောင် ပစ်ကပ်ကားနဲ့ သယ်ဆောင်စွန့်ပစ်ခဲ့ကြောင်း ရဲတပ်ဖွဲ့ဆီဝန်ခံထားပါတယ်။
ကျူးလွန်သူ ထိုင်းအမျိုးသားကို နိုဝင်ဘာလ ၂၁ ရက်၊ ဒီနေ့ မနက် ၁ နာရီအချိန်မှာ Nakhon Pathom ပြည်နယ်၊ Mueang ခရိုင်မှာ ဖမ်းဆီးရမိခဲ့ပြီး လက်ရှိမှာ ရည်ရွယ်ချက်ရှိရှိ လူသတ်မှု၊အလောင်းဖျောက်ဖျက်စွန့်ပစ်မှု ပုဒ်မတွေနဲ့ အရေးယူဖို့ဆောင်ရွက်နေပါတယ်။














