Border News Agency
မုံရွာ၊ ဧပြီ ၄ ။
စစ်ကိုင်းတိုင်း၊ မုံရွာမြို့နယ်၊ အနောက်မြောက်တိုင်းစစ်ဌာနချုပ် (နမခ) ကနေ ပျံသန်းလာတဲ့ စစ်ကော်မရှင်တပ်ရဲ့ Mi-17 ရဟတ်ယာဉ်တစီးကို ပစ်ခတ်ခဲ့ရာမှာ ကျည်ထိမှန်သွားတယ်လို့ မြိုင်မြို့နယ် ပြည်သူ့ကာကွယ်ရေးအဖွဲ့က ဧပြီလ ၄ ရက်၊ဒီနေ့ထုတ်ပြန်ပါတယ်။
အဲဒီအနောက်မြောက်တိုင်းစစ်ဌာနချုပ်ကနေ ဧပြီလ ၃ ရက်နေ့က ပေါက်မြို့နယ် ကပစ ၂၄ နဲ့ပင်ထောင်ပျူစောထီးရွာဘက်ကို ပျံသန်းလာတဲ့ရဟတ်ယာဉ်ကို ပွိုင့်-၅ စက်လက်နဲ့ ပစ်ခတ်ခဲ့တာဖြစ်ပြီး ရဟတ်ယာဉ်ကို ကျည်ထိမှန်သွားတယ်လို့ဆိုပါတယ်။
အဲဒီရဟတ်ယာဉ်ဟာ ကျည်ထိမှန်မှုကြောင့် ထိခိုက်ပျက်စီးမှု အခြေအနေအသေးစိတ်ကိုတော့ ဆက်လက်စုံစမ်းနေဆဲ ဖြစ်တယ်လို့ဆိုပါတယ်။
အခုရက်ပိုင်းအတွင်း ပေါက်နယ်နဲ့ မြိုင်နယ်တွေမှာ စစ်ကော်မရှင်တပ်က စစ်ရေးလှုပ်ရှားမှုတွေ တိုးမြှင့်လုပ်ဆောင်နေတာကြောင့် ဒေသခံပြည်သူတွေနဲ့ ကာကွယ်ရေးတပ်ဖွဲ့ဝင်တွေအနေနဲ့ စစ်ရေးသတိနဲ့ နေထိုင်ကြဖို့လည်း မြိုင်ပကဖက အသိပေးထားပါတယ်။
