Border News Agency
ကနေဒါ၊ဇွန် ၁၁။
အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင် ဦးဆောင်တဲ့ ကိုယ်စားလှယ်အဖွဲ့ဟာ ၁၀ ရက်ကြာ ကနေဒါနိုင်ငံခရီးစဉ်အတွင်း ပေါ်လစီအင်စတီကျူတွေနဲ့ တွေ့ဆုံပြီး မြန်မာ့အရေးကို နိုင်ငံတကာက အာရုံစိုက်မှုမလျော့ကျစေဖို့ ဆွေးနွေးခဲ့ပါတယ်။
အဲဒီခရီးစဉ်မှာ ကနေဒါရောက် မြန်မာ့ဒီမိုကရေစီအရေး လှုပ်ရှားသူတွေနဲ့ Town Hall တွေ့ဆုံပွဲတွေ ပြုလုပ်ခဲ့ပြီး တော်လှန်ရေးကာလအတွင်း ဖြစ်ပေါ်တိုးတက်မှုတွေနဲ့ စိန်ခေါ်မှုတွေကို အပြန်အလှန် ဆွေးနွေးခဲ့ကြပါတယ်။
အဲဒီအပြင် ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ (SCEF) ပေါ်ပေါက်လာရတဲ့ ရည်ရွယ်ချက်တွေကို ပြည်ပရောက်မြန်မာတွေနဲ့ လူထုကို မိတ်ဆက်ရှင်းပြခဲ့တာပါ။
“တော်လှန်ရေးကို ထောက်ပို့နေကြတဲ့ ပြည်ပရောက်မြန်မာတွေနဲ့ တွေ့ပြီး အားပေးအားယူလုပ်ရင်း ဆက်ဆံရေး တည်ဆောက်နိုင်ခဲ့တယ်။” လို့ ဒေါ်ဇင်မာအောင်က ပြောပါတယ်။
အဲဒီခရီးစဉ်မှာ ဒေါ်ဇင်မာအောင်နဲ့အတူ KNU၊ IEC က ကိုယ်စားလှယ်တွေနဲ့ NUG သမ္မတအကြံပေး ဦးကျော်ဇောတို့လည်း ပါဝင်ခဲ့ကြပါတယ်။
SCEF ကိုတော့ ၂၀၂၆ ခုနှစ် မတ်လမှာ KIO/KIA၊ KNU၊ CNF၊ CRPH၊ NUG နဲ့ ကရင်နီအဖွဲ့တွေ ပူးပေါင်းပြီး ဖွဲ့စည်းထားတာ ဖြစ်ပါတယ်။
