Border News Agency
မြောက်ဦး၊ဇွန် ၁၅။
အာရက္ခဒေသမှာဒီနှစ် မိုးဦးကာလမှာ သဘာဝအတိုင်း ပေါက်ရောက်တဲ့မှိုတွေကိုချက်ပြုတ်စားသောက်မိရာကနေ မှိုအဆိပ်သင့်သူ ၁၃ ဦးထက်မနည်း ရှိလာပြီလို့ APM သတင်းအရ သိရပါတယ်။
အဲဒီ အဆိပ်သင့်သူတွေထဲမှာ မောင်တောမြို့နယ်က ၄ ဦး၊မြောက်ဦးမှာ ခိုလှုံနေတဲ့ စစ်ဘေးရှောင် ၆ ဦးနဲ့ စစ်တွေမြို့က သံဃာတော် ၃ ပါးတို့ ပါဝင်နေပါတယ်။
သူတို့အားလုံးဟာ မှိုစားပြီးတဲ့နောက် မူးဝေတာတွေ၊ အော့အန်တာတွေနဲ့ ဝမ်းအောင့်တာတွေ ဖြစ်လာလို့ ဆေးရုံတွေမှာ အရေးပေါ် ကုသမှုတွေ ခံယူခဲ့ကြရတာပါ။
အဲဒီ အဆိပ်သင့်မှိုတွေ စားမိရင် မူးဝေတာတွေ၊ ဝမ်းအောင့်တာတွေ၊ ပြင်းထန်စွာ အော့အန်တာတွေနဲ့ ဝမ်းသွားတာတွေ ဖြစ်တတ်ပြီး ကုသမှုနောက်ကျရင် အသက်အန္တရာယ်ပါ စိုးရိမ်ရတဲ့ အခြေအနေမျိုး ဖြစ်တတ်ပါတယ်။
အဲဒီ သဘာဝမှိုတွေကို စားသုံးတဲ့အခါ အဆိပ်သင့်မှိုနဲ့စားသုံးသင့်တဲ့မှိုကို သေချာခွဲခြားတတ်ဖို့ အထူးသတိထားကြဖို့ ကျန်းမာရေးအသိုင်းအဝိုင်းကတိုက်တွန်းထားပါတယ်။
အခုလိုမှိုအဆိပ်သင့်မှုတွေက မိုးဦးကျတိုင်း ဖြစ်ပွားလေ့ရှိတာကြောင့် ဒေသခံတွေအနေနဲ့ တောထဲကရှာဖွေလာတဲ့ မှိုတွေကို စားသုံးတဲ့အခါ သေချာစိစစ်ပြီးမှ စားသုံးသင့်တယ်လို့လည်း အသိပေးထားပါတယ်။
