Border News Agency
တောင်ကုတ်၊ မတ် ၂၅။
အာရက္ခတပ်တော်(AA)ထိန်းချုပ်ထားတဲ့တောင်ကုတ်မြို့နယ်မှာ မတ်လ ၂၄ ရက်၊ မနက်ပိုင်းက မြေမြုပ်မိုင်းနင်းမိလို့ အမျိုးသားတဦးခြေတဖက်ပြတ်ထွက်သွားတယ်လို့ သိရပါတယ်။
အဲဒီ တောင်ကုတ်မြို့နယ်၊ ဆိပ်ကမ်းသစ်ရွာမှ အသက်ငါးဆယ်သုံးနှစ်အရွယ် ဦးဆန်းဝင်းခြေထောက်တဖက်ပြတ်ထွက်သွားခဲ့တာပါ။
အဲဒီ ဦးဆန်းဝင်းဟာ မတ်လ ၂၄ ရက်၊ မနက် ၃ နာရီအချိန်ခန့်က ဒိုးတောင်ရွာအနားမှာ ခွေးဟောင်သံကြားလို့ တက်ကြည့်ရာမှ မိုင်းကိုတက်နင်းမိပြီး ပေါက်ကွဲမှုဖြစ်ပွားခဲ့တာလို့ သိရပါတယ်။
အဲဒီမိုင်းပေါက်ကွဲမှုကြောင့် ဦဆန်းဝင်းရဲ့ ဘယ်ဖက်ခြေထောက်ပြတ်ထွက်သွားပြီး အရေးပေါ် ဆေးကုသမှုခံယူနေရတယ်လို့ သိရပါတယ်။
အာရက္ခတပ်တော်(AA)ထိန်းချုပ်ထားတဲ့ မင်းပြားမြို့နယ်၊ဂြမ်းမရွာမှာလည်း မတ်လ ၂၀ ရက်နေ့က မြေမြုပ်မိုင်းနင်းမိအသက် ၃၃ နှစ်အရွယ် ဒေါ်အေးခိုင်ဦးမှာ ခြေချောင်းနှစ်ချောင်းပြတ်ထွက်သွားခဲ့ပါတယ်။
အာရက္ခတပ်တော်ဟာ သူတို့ ထိန်းချုပ်မြို့နယ်တွေမှာ မိုင်းရှင်းလင်းရေးတွေ လုပ်ဆောင်နေပေမယ့် အရပ်သားပြည်သူတွေကတော့ မြေမြုပ်မိုင်းအန္တရာယ်တွေ၊ စစ်ကျန်လက်နက်အန္တရာယ်တွေကိုလည်း မကြာခဏကြုံတွေ့နေကြရသလို သေဆုံးဒဏ်ရာရထိခိုက်တာတွေ မကြာခဏဖြစ်နေကြတယ်လို့ အာရက္ခပြည်သူတွေက ဆိုကြပါတယ်။
အာရက္ခပြည်သူ့တော်လှန်ရေးအစိုးရဟာ မိုင်းအသိပညာပေးမှုတွေ၊ မြေမြုပ်မိုင်းအန္တရာယ်ဟောပြောပွဲတွေကို ပြည်သူလူထုတွေကြားမှာ လုပ်ဆောင်နေပြီး မိုင်းအသိပညာဝေတာတွေ၊ မိုင်းအန္တရာယ်ဆိုင်ရာ သတိပေးတာတွေကို ပုံမှန်လုပ်ဆောင်နေပါတယ်။
ဒါပေမယ့် အာရက္ခပြည်သူတွေဟာ စစ်ကော်မရှင်တပ်ရဲ့ မိုင်းတွေ၊ စစ်ကျန်လက်နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊ မိုင်အသိပညာပေးတာတွေကို ပိုမိုဆောင်ရွက်ပေးဖို့ လိုအပ်နေသေးတယ်လို့ အာရက္ခပြည်သူတွေက ဆိုကြပါတယ်။
