Border News Agency
အီရန်၊ ဧပြီ ၂၉။
အာရပ်ပင်လယ်ပြင်အတွင်း ခုတ်မောင်းနေတဲ့ M/V Blue Star III ကုန်တင်သင်္ဘောကို အမေရိကန် ၃၁ ကြိမ်မြောက် မရိန်းတပ်ဖွဲ့ဝင်တွေက ဧပြီလ ၂၈ ရက်နေ့ကတက်ရောက်စစ်ဆေးခဲ့တယ်လို့ အမေရိကန်စစ်ဌာနချုပ်ကထုတ်ပြန်ပါတယ်။
အဲဒီသင်္ဘောဟာ အမေရိကန်ရဲ့ ပိတ်ဆို့မှုကိုဖောက်ဖျက်ပြီး အီရန်ဆိပ်ကမ်းတွေဆီ သွားရောက်ဖို့ ကြိုးပမ်းနေတယ်လို့ သံသယရှိတာကြောင့် ခုလို စစ်ဆေးခံခဲ့ရတာလို့ဆိုပါတယ်။
မရိန်းတပ်ဖွဲ့ဝင်တွေဟာ သင်္ဘောပေါ်တက်ပြီး ရှာဖွေစစ်ဆေးမှုတွေလုပ်ဆောင်ခဲ့သလို ခရီးစဉ်မှတ်တမ်းတွေကိုလည်း စစ်ဆေးခဲ့ပါတယ်။
စစ်ဆေးမှုအပြီးမှာတော့ အဲဒီသင်္ဘောဟာ အီရန်ဆိပ်ကမ်းကို ဝင်ရောက်ဖို့မရှိတာ အတည်ပြုနိုင်ခဲ့တာကြောင့် အမေရိကန်တပ်ဖွဲ့တွေက ပြန်လည်လွှတ်ပေးခဲ့ပါတယ်။
အမေရိကန်တပ်ဖွဲ့တွေဟာ အရှေ့အလယ်ပိုင်းဒေသတလျှောက် အီရန်ဆိပ်ကမ်းတွေကို ပိတ်ဆို့ဖြတ်တောက်ထားပြီး စောင့်ကြည့်စစ်ဆေးမှုတွေကို အရှိန်အဟုန်နဲ့ လုပ်ဆောင်နေပါတယ်။
အီရန်နဲ့ ဆက်စပ်နိုင်တဲ့ ရေကြောင်းသွားလာမှုမှန်သမျှကို တင်းကျပ်စွာ ထိန်းချုပ်နေတာလည်း ဖြစ်ပါတယ်။
အမေရိကန်ရဲ့ ပိတ်ဆို့မှုစတင်ကတည်းက ခုချိန်ထိ စည်းကမ်းလိုက်နာမှုရှိစေဖို့အတွက် သင်္ဘောပေါင်း ၃၉ စီးကို လမ်းကြောင်းပြောင်းခိုင်းခဲ့ပြီး ဖြစ်ပါတယ်။
အီရန်နိုင်ငံဆီ ကုန်စည်နဲ့ စွမ်းအင်စီးဆင်းမှုတွေကို ရပ်တန့်စေဖို့အတွက် အမေရိကန်က ရေကြောင်းဗျူဟာကို အဓိကထား သုံးစွဲနေတာပါ။
ဒေသတွင်း တင်းမာမှုတွေ မြင့်တက်နေချိန်မှာ အခုလို ပင်လယ်ပြင်အတွင်း စစ်ဆေးမှုတွေဟာ ပိုမိုများပြားလာနေတာလည်းဖြစ်ပါတယ်။
