Border News Agency
ရန်ကုန်၊ ဇူလိုင် ၁၆။
အာဏာသိမ်းစစ်တပ်က ကျူးလွန်နေတဲ့ ရာဇဝတ်မှုတွေမှာ အာဆီယံနဲ့အဖွဲ့ဝင်နိုင်ငံတချို့ကအစိုးရတွေ၊ကုမ္ပဏီတွေ ပူးပေါင်းပါဝင်ပြီး ငွေကြေးနဲ့လက်နက်တွေ ထောက်ပံ့နေတာကို ချက်ချင်းအဆုံးသတ်ဖို့ Justice For Myanmar (JFM) က ဇူလိုင်လ ၁၅ ရက်နေ့ မှာ တောင်းဆိုလိုက်ပါတယ်။
အာဆီယံဟာဘုံသဘောတူညီချက်ငါးချက် ချမှတ်ထားပေမယ့် ငါးနှစ်ကျော်တဲ့အထိ စစ်တပ်က ကတိမတည်တာကို အရေးမယူဘဲ ရာဇဝတ်မှုတွေမှာ ကြံရာပါဖြစ်နေတယ်လို့ JFM က ထောက်ပြပါတယ်။
မကြာသေးခင်က ဘန်ကောက်မှာလုပ်ခဲ့တဲ့ အာဆီယံနိုင်ငံခြားရေးဝန်ကြီးတွေနဲ့ အလွတ်သဘောတွေ့ဆုံပွဲဟာလည်း အာဏာသိမ်းစစ်တပ်ကို ရာဇဝတ်မှုတွေ ဆက်ပြီးကျူးလွန်ဖို့ အားပေးရာရောက်ခဲ့တယ်လို့ ဆိုပါတယ်။
အဲဒီထဲ ထိုင်း၊ဗီယက်နမ်နဲ့ စင်ကာပူနိုင်ငံတွေရဲ့ စီးပွားရေးပတ်သက်မှုတွေကြောင့် အာဏာသိမ်းစစ်တပ်က အကြမ်းဖက်မှုတွေကို ဆက်လုပ်နိုင်နေတာဖြစ်ပြီး ထိုင်းအစိုးရပိုင် PTTEP ကုမ္ပဏီက ကမ်းလွန်ဓာတ်ငွေ့စီမံကိန်းကနေတစ်ဆင့် ငွေကြေးထောက်ပံ့နေသလို၊ စစ်ခေါင်းဆောင်ရဲ့ သားနဲ့ ချွေးမဟာလည်း ဘန်ကောက်မှာ ဘတ်ကိုးဆယ်ရှစ်သန်းတန် ဇိမ်ခံအိမ်ရာ ဝယ်ယူထားတာ ဖြစ်ပါတယ်။
အဲဒီအပြင် ဗီယက်နမ်အစိုးရပိုင် Viettel ကုမ္ပဏီက Mytel ကနေတဆင့် စစ်တပ်အတွက် အခွန်ငွေနဲ့ထောက်လှမ်းရေးနည်းပညာတွေ ပံ့ပိုးပေးနေပြီး စင်ကာပူမှာလည်း စစ်လက်နက်ပွဲစားကုမ္ပဏီတွေ တရားဝင်မှတ်ပုံတင်ပြီး စီးပွားရှာနေဆဲ ဖြစ်တယ်လို့ ဆိုပါတယ်။
အာဆီယံဟာ အာဏာသိမ်းစစ်တပ်ကို ကာကွယ်ရေးအစည်းအဝေးတွေမှာ ဆက်ပြီးပါဝင်ခွင့်ပေးခဲ့သလို ၂၀၂၃ ခုနှစ်မှာ လေတပ်ဦးစီးချုပ်များညီလာခံ ဥက္ကဋ္ဌအဖြစ်ပါတာဝန်ပေးခဲ့တာကြောင့် စစ်တပ်ကို စစ်ရေးစွမ်းရည်မြှင့်ဖို့ လမ်းဖွင့်ပေးခဲ့ရာရောက်တယ်လို့ ဖော်ပြထားပါတယ်။
အဲဒါကြောင့် အာဆီယံအနေနဲ့ အာဏာသိမ်းစစ်တပ်ဆီ စီးဆင်းနေတဲ့ ဘဏ္ဍာငွေ၊ လက်နက်၊ နည်းပညာနဲ့ လေယာဉ်ဆီတွေကို ချက်ချင်းဖြတ်တောက်ပြီး မြန်မာပြည်သူတွေနဲ့အတူ ပြတ်ပြတ်သားသား ရပ်တည်ပေးဖို့ JFM က တိုက်တွန်းတောင်းဆိုထားပါတယ်။
