Border News Agency
ဗင်နီဇွဲလား၊ဇွန် ၂၅။
ဗင်နီဇွဲလားနိုင်ငံမှာပြင်းအား ၇ ဒသမ ၂ နဲ့ ၇ ဒသမ ၅ ရှိတဲ့ အင်အားပြင်းငလျင်နှစ်ခု စက္ကန့်ပိုင်းအတွင်း ဆက်တိုက်လှုပ်ခတ်သွားခဲ့လို့ အဆောက်အအုံတွေ ပြိုကျပြီး အနည်းဆုံး လူ ၃၂ ဦး သေဆုံးကာ ၇၀၀ ကျော် ဒဏ်ရာရရှိသွားတယ်လို့ အာဏာပိုင်တွေက ထုတ်ပြန်ပါတယ်။
ငလျင်ဗဟိုချက်ဟာ မြို့တော်ကရာကတ်စ်ရဲ့ အနောက်ဘက် ကမ်းရိုးတန်းမြို့ဖြစ်တဲ့ မိုရွန်မြို့အနီးမှာ ဖြစ်ပေါ်ခဲ့တာပါ။
ယာယီသမ္မတ ဒယ်လ်စီရိုဒရီဂွက်ဇ်က နိုင်ငံကို အရေးပေါ်အခြေအနေ ကြေညာလိုက်ပြီး အထူးသဖြင့် လာဂွိုင်ရာ (La Guaira) ပြည်နယ်ဟာ အဆိုးရွားဆုံး ပျက်စီးဆုံးရှုံးခဲ့လို့ ဘေးအန္တရာယ်ဇုန်အဖြစ် သတ်မှတ်လိုက်ပါတယ်။
အဲဒီပျက်စီးမှုတွေကြား ကယ်ဆယ်ရေးတွေ လုပ်ဆောင်နေဆဲဖြစ်လို့ သေဆုံးသူအရေအတွက် ဒီထက်မက ပိုတိုးလာနိုင်တယ်လို့ သတိပေးထားပါတယ်။
ငလျင်ဒဏ်ကြောင့် မြို့တော်ကရာကတ်စ်ရဲ့ အဓိကလေဆိပ်ဖြစ်တဲ့ ဆီမွန်ဘိုလီဗာ အပြည်ပြည်ဆိုင်ရာလေဆိပ်လည်း ပြင်းထန်စွာ ပျက်စီးသွားခဲ့လို့ ပိတ်ထားရသလို မြေအောက်ရထားပြေးဆွဲမှုတွေကိုလည်း ဆိုင်းငံ့ထားရပါတယ်။
အဲဒီအပြင် နေရာအများအပြားမှာ လျှပ်စစ်မီးနဲ့ ဖုန်းလိုင်းတွေ ပြတ်တောက်သွားခဲ့လို့ ပြည်သူတွေဟာ နောက်ဆက်တွဲငလျင်တွေကို ကြောက်လန့်ပြီး လမ်းမတွေပေါ်မှာပဲ တညလုံး ဖြတ်သန်းခဲ့ကြရပါတယ်။
အဲဒီငလျင်လှုပ်ခတ်မှုကို အိမ်နီးချင်း ကိုလံဘီယာနိုင်ငံနဲ့ ဘရာဇီးနိုင်ငံတွေအထိပါ ခံစားခဲ့ရပြီး၊ လက်ရှိမှာ ဘရာဇီး၊ မက္ကဆီကို၊ အီကွေဒေါနဲ့ ဘိုလီးဗီးယား အပါအဝင် အမေရိကန်နိုင်ငံတို့က ကယ်ဆယ်ရေးနဲ့ လူသားချင်းစာနာမှုဆိုင်ရာ အကူအညီတွေပေးဖို့ ကမ်းလှမ်းထားကြပါတယ်။
အခုလှုပ်ခတ်ခဲ့တဲ့ အင်အားပြင်းငလျင်ဟာ ငလျင်လှုပ်ခတ်မှုနည်းပါးတဲ့ ဗင်နီဇွဲလားနိုင်ငံအတွက် ရာစုနှစ်တခုကျော်အတွင်း အပြင်းထန်ဆုံးနဲ့ အဆိုးရွားဆုံး သဘာဝဘေးအန္တရာယ်တခု ဖြစ်လာခဲ့ပါတယ်။
