Border News Agency
ဂါဇာ၊ဇွန် ၂၄။
အစ္စရေးစစ်တပ်ဟာပါလက်စတိုင်းနယ်မြေအတွင်းရှိ ကလေးငယ်တွေကို စနစ်တကျ ပစ်မှတ်ထား တိုက်ခိုက်နေပြီး အဲဒီလုပ်ရပ်တွေဟာ ဂါဇာကမ်းမြောင်ဒေသမှာ လူမျိုးတုံးသတ်ဖြတ်မှု၊စစ်ရာဇဝတ်မှုနဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုမြောက်တယ်လို့ ကုလသမဂ္ဂ စုံစမ်းစစ်ဆေးရေးကော်မရှင်က ဇွန်လ ၂၃ ရက်နေ့မှာ အစီရင်ခံစာ ထုတ်ပြန်လိုက်ပါတယ်။
ပြီးခဲ့တဲ့ ၂၀၂၃ ခုနှစ်၊အောက်တိုဘာလကစပြီး ဂါဇာမှာသေဆုံးခဲ့ရသူတွေရဲ့ ၃၀ ရာခိုင်နှုန်းဟာ ကလေးငယ်တွေဖြစ်နေပြီး မီးဖွားခန်းနဲ့ မွေးကင်းစကလေး အထူးကြပ်မတ်ကုသဆောင်တွေကို တိုက်ခိုက်တာ၊ကူညီကယ်ဆယ်ရေးပစ္စည်းတွေ မဝင်ရောက်အောင် ပိတ်ဆို့တာတွေကြောင့် ကလေးငယ်တွေရဲ့ အသက်ရှင်နိုင်ခြေကို အကြီးအကျယ် ထိခိုက်စေခဲ့တယ်လို့ဆိုပါတယ်။
အဲဒီအပြင် အစ္စရေးတပ်ဖွဲ့တွေဟာကလေးသူငယ်ပြုစုစောင့်ရှောက်ရေးဂေဟာတွေနဲ့ ကျောင်းတွေကို ဖျက်ဆီးခဲ့သလို ကလေးငယ်တွေကိုမတရားဖမ်းဆီးတာ၊ညှဉ်းပန်းနှိပ်စက်တာနဲ့လိင်ပိုင်းဆိုင်ရာ အကြမ်းဖက်မှုတွေ ကျူးလွန်နေတယ်လို့လည်း ဖော်ပြထားပါတယ်။
၂၀၂၅ ခုနှစ်၊ အောက်တိုဘာလက အပစ်အခတ်ရပ်စဲရေး ကြေညာခဲ့ပေမယ့် အပြည်ပြည်ဆိုင်ရာဥပဒေတွေကို ချိုးဖောက်ပြီး ကလေးငယ်တွေ သေဆုံးတာနဲ့ ဒဏ်ရာရတာတွေဆက်လက်ဖြစ်ပေါ်နေဆဲလို့ UN က သတိပေးထားပါတယ်။
UNICEF ရဲ့ ခန့်မှန်းချက်အရ စစ်ပွဲစတင်ချိန်ကတည်းက ကလေးငယ် ၅၀,၀၀၀ ကျော် သေဆုံး၊ဒဏ်ရာရရှိခဲ့ပြီး အပစ်အခတ်ရပ်စဲရေးကာလအတွင်းမှာပင် ပျမ်းမျှအားဖြင့် နေ့စဉ် ကလေးတဦး သေဆုံးနေရတယ်လို့သိရပါတယ်။
